L'Academia Francesa refuga la inclusión de les llingües rexonales na Constitución

"L'Academia Francesa acaba facer públicu'l so paecer no que cinca a la inclusión de les llingües rexonales na Constitución gala. La institución académica camienta que, torgar l'artículu 2 de la vieya Constitución francesa onde se conseña que ""la llingua de la República ye'l francés"", pue ""afeutar a la identidá nacional"".

Nun espresivu escritu, los académicos valoren les bones intenciones de los diputaos franceses, pero consideren que nun fai falta incluir la referencia a les llingües, sacante'l francés, al tiempu que recomienden que la defensa d'éstes ""s'esprese n'otros llugares"".

Del mesmu mou, reconocen que les llingües pertenecen al patrimoniu francés, pero cuestionen el fechu de qu'apaeza conseñao nel artículu 1 de la Constitución, el mesmu nel que se denoma Francia como ""una República indivisible, laica, democrática y social"". Asina camienten que'l desarrollu de la enmienda pue torgar ""l'accesu igualitariu de toos a l'alministración y la xusticia"", valorando'l valor de la llingua francesa como ""forxadora de Francia"".

La Cámara de los Diputaos alcordare'l pasáu 22 de mayu incluir nel testu de la Carta Magna una referencia a les llingües rexonales como ""Patrimoniu de la Nación"", calteniendo sicasí'l francés como única llingua oficial. La enmienda fuera recibida como una gran victoria polos parlamentarios bretones, corsos o alsacianos."