Pal PP la llingua asturiana ye dalgo de “sectores radicales que quieren coses que nun quieren los asturianos”

El PP enfótase nuna ofensiva nueva contra l’asturianu. Mercedes Fernández comenzóla’l vienres na Xunta Xeneral, siguió con ella’l llunes tres la xunta de voceros y el martes contó col relevu de David González Medina, que considera l’idioma dalgo de “sectores radicales que quieren coses que nun quieren los asturianos”.

La confirmación del miércoles na Comisión Especial d’Estudiu sobre'l Réxime de Proteición y Promoción del Asturianu por parte del Conseyeru d’Educación y Cultura, Genaro Alonso, de que’l plan esperimental pa facer l’asturianu y el gallego-asturiano llingua vehicular en Primaria, como afita’l Plan de Dignificación de la Llingua Asturiana pendiente d’aprobación definitiva por parte del Conseyu de Gobiernu –en tolos niveles educativos, según el documentu aprobáu na Xunta Xeneral con 31 votos a favor, 11 en contra y 3 astenciones–, tuvo una rápida contestación por parte de la vocera popular Mercedes Fernández. “Dexe de facer esperimentos col bable”, esixó’l vienres al presidente del país, Javier Fernández, apuntando que l’Estatutu d’Autonomía nun contempla l’asturianu como llingua oficial, polo que’l so usu como idioma vehicular na Educación ye illegal.

Nun quedó ehí la tamién presidenta del Partido Popular (PP) d’Asturies, qu’ayeri, tres la Xunta de Voceros de la Xunta Xeneral insistió que “ye una irresponsabilidá illegal que Javier Fernández pretenda que s’imparta enseñu n’asturianu” y declaró la so intención de llevar l’asuntu al Plenu d’esta selmana pa qu’Alonso “esplique a la Cámara ónde acordó esti plan esperimental”. “Agora quierse dir pela puerta d’atrás a una cooficialidá que nun esiste n’Asturies, que nun afita l’Estatutu, polo que nun se pue convertir l’asturianu en llingua vehicular; lo que nun ye llegal nun se pue elixir; lo que contravién al Estatutu no se pue someter a eleición”, señaló tres recordar que nel país “la única llingua oficial ye’l castellanu”.

Contradicciones populares con respeuto a la voluntá de les families

Esta mañana’l testigu de Mercedes Fernández garrólu’l diputáu y voceru d’Educación, González Medina, que refugó la midida na que trabaya’l Gobiernu pal cursu viniente y qu’inclusive s’atrevió a discutir la situación actual de la materia en Llingua Asturiana y Gallego-asturiano en Primaria, onde compite con Cultura Asturiana. “Apostamos porque l’alternativa sían les nueves teunoloxíes y un segundu idioma estranxeru”, apuntó, pa depués contradicise al afirmar defender “frente a la imposición del Gobiernu socialista, llibertá d’eleición pa les families”, yá que’l plan esperimental pa facer l’asturianu vehicular ye voluntariu pa los escolinos y escolines.

“Ye un atrevimientu, una irresponsabilidá y un incumplimientu de la normativa que rix el sistema educativu ‘nacional’ y asturianu” señaló darréu con respeuto al mesmu. “El bable nun ye una llingua cooficial, y si se quier profundizar na so proteición y promoción, alantre, van contar col nuesu sofitu, pero refugamos alderiques tapaos pa intentar una cooficialidá que nun s’atreven a dicir de forma abierta; que lo digan a la cara, pero que nun vulneren y se salten la llei continuamente porque nun s’atreven a plantegar abiertamente dalgo que nun quieren los asturianos”, añadió.

Los populares afirmen que pa qu’una “llingua sía oficial lo primero que tien que reunir ye la demanda ciudadana, y la demanda de los asturianos sobre’l bable ye mínima, perbaxa, y por ello nun se pue imponer una llingua como vehicular cuando nun ye oficial”. “Promoción y proteición del asturianu, sí, imposición, no”, resumió’l diputáu, p’apuntar darréu que l’anuncio del Gobiernu supón un ”chisgu a sectores radicales que quieren coses que nun quieren los asturianos”.