Los ministros d'Esteriores de la UE alcuerden nun paralizar el Tratáu de Lisboa

"La mayor parte de los ministros d'Asuntos Esteriores de la Unión Europea, aconceyaos el llunes en Luxemburgo, defendieron entamar una reflexón sobre los pasos a siguir dempués de qu'Irlanda votara ""non"" al Tratáu de Lisboa, col envís de buscar una solución a la negativa irlandesa.

Al empar, los más d'ellos mostráronse partidarios de siguir col procesu de confirmación de los ocho Estaos Miembros que tovía nun se pronunciaron, ente los que s'atopa España.

Dimitri Rupel, ministru d'Asuntos Esteriores d'Eslovenia, país qu'exerce este semestre la presidencia de la Unión Europea, almitió que ""sería arriesgao dicir que vamos devolve-y la vida al tratáu"" y almitió ""nun tener nenguna solución"" pal non irlandés, apoyáu pol 53% de los votantes. ""Nesti momentu encaramos un bloquéu. Agora ye tiempu pa pensar un poco, analizar y escuchar"" a la espera de lo que decidan los xefes d'Estáu y de Gobiernu de los Ventisiete, cuando s'aconceyen esti xueves y vienres, en Bruseles, esplicó a la so llegada al Conseyu. ""Vamos escuchar al ministru irlandés, porque lo mesmo él tien una solución, pero de momentu vamos esperar, pensar, analizar, consultar y respetar el so votu "", añadió.
Pa la Unión Europea, siguió, ""ye perimportante respetar el procesu democráticu"". ""Nun podemos obviar lo que pasó pero camiento que l'espíritu ye fuerte y que vamos ver nes próximes selmanes más confirmaciones, lo que va significar qu'hai apoyu pa una Europa fuerte"", añadió.

Pal xefe de la diplomacia irlandesa, Michael Martin, la decisión qu'espresaron los irlandeses el pasáu xueves ""tien de respetase"" porque pese a acoyela con ""deceición"" per parte del Executivu de Dublín, trátase de ""una decisión democrática del pueblu irlandés"". ""Ye mui pronto na nuestra opinión pa entamar a buscar soluciones"" hasta que se ""analicen les cuestiones que tán detrás del votu"" irlandés, consideró."