Losantos condenáu a pagar por "inxuries"

"El periodista de la Cope Federico Jiménez Losantos foi condenáu por un delitu d'inxuries graves al alcalde de Madrid, Alberto Ruiz-Gallardón, teniendo que pagar una multa de 36.800 euros, cien euros al día a lo llargo de doce meses, según queda conseñao na sentencia.

La xuez de lo Penal númberu 6 de Madrid, Inmaculada Iglesias, condenó al periodista por un delitu d'inxuries graves escontra l'alcalde, a quien acusó de querer ""obviar"" la investigación del 11-M cola finalidá de llegar al poder. Esta cantidá va ser entregada por Gallardón a l'Asociación Víctimes del Terrorismu (AVT), según anunció'l primer edil.

El xuiciu escontra'l llocutor quedó vistu pa sentencia'l pasáu 4 de xunu. Nes sos últimes declaraciones Losantos aprovechó p'atacar otra vuelta a Gallardón acusándolu de ""caciplar"", al traviés de la so querella, a ""l'Alministración de Xusticia como mecanismu de muestra del so poder políticu"". Según dixo, la so finalidá yera amosar ""a tol mundu qu'equí, l'únicu dueñu de la derecha ye él"". ""Ye una pena que tea a un tris de llogralo y qu'esto tea ayudándolu"", aseguró.

La sentencia tien en cuenta, sobre manera, les declaraciones nes que'l direutor de ""La Mañana"" acusó al primer edil de ""farsante redomáu"" y de querer ""tapar"" el 11-M, nun ""mecanismu miserable, illegal ya inmoral de tapecimientu de la masacre"" de 200 persones. Asina mesmo, el testu recueye delles frases como ""Tú yes un elementu ayenu al PP, tú yes un estorbu, tú yes una calamidá, tú nun yes alcalde, tú yes una torga p'averiguar el 11-M"".

Arriendes d'ello la sentencia sorraya que les declaraciones del periodista son ""formalmente vexatories y claramente insultantes (...) y nun hai dulda de que queríen vexar la imaxe y dignidá del querellante""."