Una roxa pol asturianu

La empresa cervecera Bayura Asturies Craft Beer produz en collaboración con Iniciativa pol Asturianu la ‘Cerveza pol Asturianu’, una bébora cola que los ciudadanos pueden sofitar el llabor d’esta organización col so consumu. El sábadu va ponese a la venta con una folixa na xixonesa llibrería-café La Revoltosa.

Esti proyeutu nuevu d’Iniciativa pol Asturianu naz baxo’l lema ‘La cerveza que-y presta a la to llingua’ col oxetivu de “ufiertar al públicu un productu de calidá col que faer atractivo collaborar con Iniciativa pol Asturianu y el nuesu llabor, col qu'introducir l'usu del asturianu n'espacios onde davezu nun suel tar presente”, apuntó’l Inaciu Galán, qu’añadió que ye “una forma prestosa de da-y sofitu al asturianu, con un xestu tan cenciellu como tomar unes cerveces colos amigos en cualquier establecimientu, o llevales pa casa y poneles nuna cena”. El presidente del coleutivu que trabaya pola normalización del idioma presentó esti productu ayeri nun actu nel Conseyu de la Mocedá de Xixón xunto con Serxu Solares, direutor de Bayura.

“Ye una cerveza prestosa, que va prestar a la to llingua; ye una roxa qu’entra fácil, de poco alcohol, que permite beber unes cuantes”, apuntó Solares. La tirada inicial ye de 5.000 botelles que se van vender a un preciu d’ente 2,5 y 3 euros en chigres de magar el sábadu, cuando ta prevista una folixa de presentación en La Revoltosa (Juan Alonso, 12) a partir de les 21 hores.