Un Día Internacional de la Llingua Materna con repercusión

La celebración del Día Internacional de la Llingua Materna llevó al entamu de decenes d’actividaes en tol país al rodiu del asturianu y el gallego-asturiano, nes que la reciella foi especialmente protagonista. En Xixón y Avilés presentáronse delles iniciatives pa la promoción y difusión del idioma y la so toponimia.

Ana Montserrat López Moro, conceyala d’Educación y Cultura, y María Xosé Rodríguez López, responsable de la Oficina Municipal de la Llingua de Xixón, encargáronse de presentar les aiciones de la fase siguiente de ‘Llámalo pol nome, ye lo normal’, campaña sobre toponimia de la que yá pudo vese dellos aspeutos en redes sociales y pol que s’entamaron actividaes con neños y neñes en Mercaplana y s’editó un calendariu. Agora van siguir difundiéndose los nomes de llugar en Facebook y Twitter, asina como’l so orixe, y va promovese’l so emplegu ente la ciudadanía y los comerciantes.

“Ye un bon día pa reflexonar sobre’l papel que toos tenemos que cumplir nel respetu y espardimientu de les llingües, empezando pola de nueso, l’asturianu; anque en munchos casos, por nun dicir la mayoría, l’asturianu nun sía la nuesa llingua materna –pa una gran mayoría de los asturianos ye l’amestáu o l’español–, ye una llingua autóctona que debemos protexer”, comentó López Moro. Pela so parte, Rodríguez López adelantó que van editase dípticos colos topónimos, cartelería o bolses, y va promocionase la toponimia con autocares mientres el branu y entamase charres sobre l’orixe de los topónimos tradicionales, únicos oficiales en Xixón dende’l 2006.

Otra manera, l’Ayuntamientu de Xixón va solicitar una revisión de la toponimia menor y que’l nome oficial del conceyu sía’l billingüe ‘Gijón/Xixón’, el que tien anguaño la cabecera municipal.

Cerveza pol Asturianu

Nesta xornada d’emponderamientu del idioma propiu, Iniciativa pol Asturianu y Bayura Asturies Crafta Beer presentaron nel Conseyu de la Mocedá de Xixón una cerveza baxo'l nome 'Cerveza pol Asturiaru‘ y el lema 'La cerveza que-y presta a la to llingua’, que va tar a la venta de magar el sábadu.

Proyeutu pilotu n’Avilés pa escueles de 0 a 3 años

La conceyala de Cultura, Yolanda Alonso, presentó xunto a Montserrat Machicado, responsable de la Estaya de la Llingua; Mónica Alonso García, xefa de seición de la conceyalía d'Educación; y Leonor Gago, direutora de la Escuelina de La Madalena, un proyeutu pilotu que va permitir llevar l’asturianu a la reciella de 0 a 3 años dientro de les actividaes complementaries de les escueles. Pa ello, el Conceyu d'Avilés, al traviés de la Estaya de la Llingua, va programar sesiones de cuentos pa críos y críes, que se van celebrar en delles escueles d'Educación Infantil de la ciudá y nes que va participar el conocíu actor Carlos Alba ‘Cellero’. Éstes comenzaron ayeri y siguen güei.

La campaña tamién va tener un material específicu pa estos niveles. Consiste na distribución d'una caxa con un xuegu infantil onde neños y neñes van poder diferenciar animales de la casería como la pita, la oveya, la xata, el coneyu, el perru, el coríu, el gochu y el burru. El xuegu compónse tamién d'una alfombra onde ta'l contornu del animal col so nome y una pieza cola imaxe del mesmu. Asina, los neños y neñes van poder rellacionar conceutos al empar que deprenden el nuestru idioma.

Teatru, cine y música

Tolos centros escolares de país entamaron aiciones ayeri pol Día Internacional de la Llingua Materna, qu’en munchos casos van allargase mientres tola selmana. Asina, nos recreos lleóse un ‘Manifiestu pola llingua materna’ aprovechando la xornada na que “festexamos que nesta tierra tenemos una llingua nuestra, vuestra, de toos y toes”.

Esta llectura completóse en munchos casos con iniciatives propies, como les entames nel IES García de la Concha, de Villaviciosa, con música y trabayu sobre’l pallabreru de la güerta, y nel númberu 5 d’Avilés, cola presentación d’un curtiumetraxe n’asturianu fechu polos alumnos de Llingua Asturiana.

Mentes, la Direición Xeneral de Planificación Llingüística y Normalización entamó dos actos institucionales, el primeru’l llunes en Mieres con un conciertu d’Anabel Santiago pa alumnos y alumnes de Secundaria nel auditoriu de la Casa de Cultura Teodoro Cuesta, y cola representación ayeri nel Auditoriu Municipal de La Pola Siero, pa los escolinos y escolines de Primaria y Infantil del conceyu, de ‘Grana de cardamomu’, obra del grupu de teatru El Callejón del Gato.

‘Memes’ pol idioma

El Día Internacional de la Llingua Materna tamién algamó gran repercusión en redes sociales gracies a la campaña d'Iniciativa pol Asturianu siguiendo la idea llanzada por Rising Voices llamáu 'retu del meme na llingua materna' cola que se pretende visibilizar la diversidá llingüística y que sigue hasta’l domingu. Twitter, de forma especial, ye onde más memes sobre l’idioma se pueden ver baxo les etiquetes #MemeML y #asturianu o #gallegoasturiano.