La visita del líder al Hermanos Antuña, n'asturianu en RTPA

Tanto la radio como la televisión pública van comentar en llingua asturiana'l choque ente'l Caudal y la Cultural d'esti domingu.

Les emisiones n'asturianu na RTPA que comenzaron a producise de manera periódica n'avientu, van estrenase nel Hermanos Antuña. L'ente públicu de comunicación va emitir el Caudal-Cultural d'esti domingu al meudía con comentarios de Miguel Fernandi y Nacio González, na televisión, y de Fernando García de Dios, na radio.

Los d'Iván Ania reciben al líder del grupu primeru de Segunda División B tres algamar un empate importante ensin goles n'El Toralín frente a una Ponferradina metida na llucha pol cuartu puestu que permite lluchar pol ascensu a Segunda División A, categoría que perdió la temporada pasada. La Cultural y Deportiva Leonesa, mientres, ta firmando la meyor campaña de los tiempos últimos del club lleonés, con una trayeutoria destacada que-y permite ocupar el primer puestu de la tabla con cuatro puntos de ventaya col so persiguidor más inmediatu, el Real Racing Club.

Día del Club

El Caudal decretó'l choque del domingu como Día del Club, polos que los socios adultos han de pagar 10 euros y los sub-25 y sub-18, 5 euros, por asistir. El preciu pal públicu ye de 17 euros en Xeneral y de 20, en Tribuna, qu'hasta'l vienres van tener un costu reducíu de 15 y 18 euros.