La Cámara aprueba'l segundu creitu estraordinariu cola astención d'IX-BA-LV

"El Plenu de la Xunta Xenral aprobó esti vienres, cola astención de los diputaos d'IX-BA-LV, el segundu creitu estraordinariu del Executivu asturianu que xube a 174,8 euros y que va apoyar, según el Gobiernu autonómicu, una inversión d'alredor de 270 millones d'euros.

Izquierda Xunida, que s'astuvo na aprobación, votó a la escontra de la tramitación parlamentaria urxente de llectura única.
El conseyeru d'Economía y Asuntos Europeos, Jaime Rabanal, xustificó la necesidá d'aprobar, per tramitación urxente, esti segundu creitu y sorrayó la ""gran relevancia del mesmu col actual contestu económicu"". Asina, indicó que la puya pública que se promueve con esti segundu creitu pue ser clave y pue ayudar a pequeñes y medianes empreses a evitar les peores consecuencies de la crisis de mercáu.

Recordó qu'esta segunda iniciativa permite poner en marcha 298 actuaciones que sumen una inversión total de 59 millones d'euros. Amás, inclúi una partida de 85 millones pa sofitar la financiación sanitaria y tres millones pa financiar l'incrementu de la plantiya de funcionariáu públicu. Asina manifestó que toes estes iniciatives suponen un importe total de 147,8 millones y promueven una inversión d'alredor de 270 millones, lo que, xunto cola prollongación presupuestaria y l'anterior creitu estaordinariu, faen un total de 1.194 millones.

""Esti volume d'inversión ye realmente perimportante en rellación col conxuntu de la economía asturiana y amuesa'l compromisu del Gobiernu de poner en marcha los recursos posibles énte una nueva situación económica"", Rabanal, qu'añadió que nesti momentu discútese muncho sobre cómo tien de ser la denomación económica actual ""lo que tien de dicise ye qu'ensin dulda tamos énte un contestu económicu complicáu"", dixo Rabanal.

Sicasí, afirmó qu'Asturies ta preparada pa la situación d'inseguridá a la que s'enfrenten y marcó cuatro llinies nes que tendríen que basase'l trabayu del Gobiernu. Per una parte la necesidá d'orientar les polítiques de gastu hacia los proyeutos que más ayuden a caltener l'actividá económica, faciendo un apueste por garantizar la sostenibilidá y los servicios públicos. Les otres dos llinies de trabayu pasen por tresmitir a los ciudadanos la confianza necesaria pa encarar situaciones difíciles, que con polítiques apropiaes ""van ser quién a superar"" y nun tomar decisiones que tapezan el comportamientu de los axentes económicos y que nun seyan sostenibles nel mediu y llargu plazu."