Rodríguez Cañas afirma que'l Gobiernu asturianu ta comprometíu col fomentu "firme" y "progresivu" del asturianu y el gallego-asturianu

"La conseyera de Cultura y Turismu del Principáu d'Asturies, Encarna Rodríguez Cañas, comprometióse esti xueves a que'l so equipu presente a primeros del próximu periodu de sesiones, ente setiembre y ochobre, l'informe d'evaluación del plan de normalización del asturianu.

Pese a qu'una resolución aprobada na Mesa d'Orientación Política, celebrada n'ochobre del 2007 indicaba que l'informe tenía de presentase a finales d'esi añu, Encarna Rodríguez esplicó que nun se pudo facer la evaluación completa, porque'l plan va prollongase hasta finales del exerciciu.

Encarna Rodríguez Cañas fizo estes manifestaciones nel desarrollu de la so intervención nel Plenu de la Xunta Xeneral del Principáu d'Asturies (XXPA), onde foi entrugada pol diputáu d'IX-BA-Verdes, Francisco Javier García Valledor, sobre la política llingüística. Valledor acusó al Gobiernu de non cumplir los mandaos de la Xunta y d'aplicar polítiques ""involucionistes"".

""Un plan qu'acaba'l 31 d'avientu del 2007 difícilmente pue ser evaluáu enantes"", señaló la conseyera de Cultura. Asina, dixo que'l plan ta ""entamando a evaluase"".

Per otru llau, defendió les polítiques del Principáu en rellación a la promoción del asturianu. Nesti sen dixo que dende'l Gobiernu d'Asturies tán ""comprometíos"" col fomentu ""firme"" y ""progresivu"" del asturianu y del gallego-asturianu. ""Siguimos con toles llinies de trabayu abiertes n'otres llexislatures"", afirmó, y punxo como exemplu les sovenciones pa potenciar l'asturianu, l'aumentu de la so presencia na RTPA, asina como l'ampliación del númberu d'oficines de normalización llingüística.

Por embargu, a Valledor nun lu convencieron les esplicaciones d'Encarna Rodríguez y mostróse ""preocupáu"" polos sos incumplimientos en rellación a les resoluciones de la Xunta. Reprochó amás el restu de polítiques del Principáu na materia. Asina, esplicó que la Xunta de Toponimia malpenes s'aconceya nos últimos meses. ""Hai una paralización y una vuelta p'atrás"", señaló y dixo que se tán ""desandando"" los pasos que se dieron na llexislatura anterior en materia de campañes d'información, rotulaciones, documentos de l'Alministración o enseñanza nos colexos."