La Fiscalía pide 11 años de cárcel a Grueso por irregularidaes na so xestión del Centru Niemeyer

Natalio Grueso, ex direutor del Centru Niemeyer, afronta un pidimientu de 11 años de cárcel por parte de la Fiscalía por irregularidaes na xestión del espaciu avilesín. Tamién solicita penes de prisión pa otros cuatro acusaos del ‘Casu Niemeyer’.

Nomáu nel 2006 pola entós conseyera de Cultura del Executivu de Vicente Álvarez Areces, Ana Rosa Migoya, como direutor de la Fundación Oscar Niemeyer –constituyida pa xestionar l’equipamientu cultural d’aquella entovía sobre planu–, ocuparía la direición del Centru Cultural Internacional Oscar Niemeyer hasta’l 2011 –añu tamién de la inauguración del mesmu–, cuando’l presidente d’Asturies, Francisco Álvarez-Cascos, decidió retirar la cesión del mesmu a la Fundación nel so afán de finar colos ‘chiringuitos’ socialistes. Tres l’adelantu de les eleiciones y la victoria de Javier Fernández, la conseyera Ana González denunció la xestión del centru tres garrar la direición del mesmu y detectar irregularidaes na xestión previa. Yera avientu del 2012.

Entes diches irregularidaes atopaes destaquen el gastu de más de 180.000 euros na cafetería y restorán del Niemeyer, y factures de viaxes de la ex muyer de Grueso a destinos internacionales, asina como de persones axenes al equipamientu cultural, ente otres. Agora Grueso afronta un pidimientu de cárcel de 11 años: 6 por una delitu de malversación de caudales públicos, 3 por falsedá de cuentes y 2 por insolvencia punible. Al mesmu hai que sumar una solicitú de 24.000 euros de multa.

Otros acusaos

La Fiscalía tamién pide prisión pa otros cuatro acusaos, siendo la pena mayor pal axente de viaxes J. M. V. R., un total de 8 años pol malversación y estafa. L’ex secretariu de la Fundación, José Luis Rebollo, afronta 2 años y 3 meses por falsedá de cuentes, al igual que la ex muyer de Grueso, nesti casu pol malversación; y l’ex xefe de producción del Niemeyer, Marc Martí, 1 añu y 6 meses, tamién por falsedá de cuentes.