El PP encamienta al Principáu que contraste la toxicidá de les Centrales Térmiques

"El diputáu del Partíu Popular na Xunta Xeneral del Principáu, Carlos Galcerán, anunció esta selmana en Mieres, la proposición non de llei que'l so grupu parlamentariu presentó'l vienres, 6 de xunu, pa encamentar al Gobiernu asturianu a contratar un estudiu epidemiolóxicu a la Universidá d'Uviéu sobre l'impautu de les centrales térmiques na salú de los que viven nel so entornu.

Según esplicó Galcerán, el Principáu fai controles sobre emisiones de CO2 y contaminación acústica pero nun dispón d'estudios sobre l'impautu de les centrales térmiques na salú.

El plantegamientu de la proposición, qu'inclúi la pitición de que'l Gobiernu facilite na Xunta la información que tenga relativa a los posibles efeutos contaminantes d'estes instalaciones, tovía nun tien fecha marcada, anque dende'l PP espera que nun se retrase.

La presentación de la propuesta tuvo llugar en Mieres porque ""el PP local foi'l primeru en denunciar la falta d'estudios na térmica de La Pereda"", según esplicó Galcerán.

El diputáu popular sorrayó la preocupación del so grupu énte los posibles efeutos nocivos de les centrales térmiques que tán ensin evaluar por falta d'estudios. N'Asturies hai delles centrales, ente les que tán la d'Aboño (Xixón), La Pereda (Mieres), Lada (Llangréu) La Barca (Tinéu) y Soto Ribera (La Ribera).

Galcerán insistió en que cuando'l PP solicitó información a la Conseyería de Salú y Servicios Sanitarios ""la rempuesta foi que nun hai estudios d'esta mena, sinón controles de vertíos y sobre emisiones de gases contaminantes"". Por eso'l PP, en base a la llexislación española y al amparu de directrices europees, considera necesario que l'Executivu asturianu faiga, amás de controles, estudios epidemiolóxicos pa detectar riesgos y d'esti mou trabayar pa evitalos."