Llangréu anima a la reciella a usar l'asturianu

"Esti miércoles 11 de xunu, presentóse nel Salón de Plenos de la Casa'l Conceyu de Llangréu la campaña de normalización social del asturianu que l'Ayuntamientu pon en marcha pa trabayar por evitar que ruempa la tresmisión xeneracional de la llingua y la cultura asturianes introduciendo l'asturianu, en mayor o menor midida, nel usu de les families.

L'actu presentación tuvo presidíu por Ester Díaz García, alcaldesa de Llangréu, y tamién asistieron Ana Oliva Rodríguez, conceyala de Cultura, Turismu y Política Llingüística, Manuel Rodríguez Rosete, coordinador del Área de Cultura y Política Llingüística de Llangréu y Eloy Antuña responsable del Serviciu de Normalización Llingüística.

Esta nueva campaña de normalización social del asturianu va repartise ente los y les recién nacíos del conceyu, trátase d'una axenda, pero non pa un añu concretu, sinón pa organizar y anotar en función del crecimientu de lo piquiñino de la casa. El llibru del Naciatu pretende rexistrar los avances del neñu o neña dende que naz hasta los 3 años. Esti llibru vien a ser continuación de la campaña AFAYÁIVOS EN CASA que l'añu pasáu yá punxera en marcha l'Ayuntamientu de Llangréu.

Trátase d'un llibru pal bebé que presenta información d'interés pa los padres y les madres y que sirve pa introducir l'asturianu nel usu de les families del nuestru conceyu. 38 páxines que presenten la evolución en semeyes y dibuxos de neños y neñes dende que tán na barriga la ma hasta los 3 años: etapes de crecimientu, calendariu de vacunación, añaes, cantares, cosadielles, xuegos infantiles, ficha personal, espacios p'anotar revisiones médiques, conseyos d'hixene y alimentación, sitiu pa dalguna semeya... Col envís d'aforrar perres y enanchar l'ámbitu d'actuación, esta campaña ponse en marcha en collaboración cola Rede de Normalización Llingüística nos Conceyos."