L'ALLA y l'Ayuntamientu d'Uviéu espublicen les obres ganadores de los "Premios Uviéu" 2006

"El poemariu ""Pisadas"" de MªEsther García López, y la novela ""L'aventura de Minho"" d'Abel Martínez González, ganadores de los premios de poesía y narrativa ""Uviéu 2006""; acaben de ser asoleyaos nuna edición conxunta de l'Academia de la Llingua Asturiana y l'Ayuntamientu d'Uviéu.

Nel poemariu ""Pisadas"" la escritora de Valdés ufiérta-y al llector unos versos qu'amuesen les sos vivencies y lu tresporten dende la realidá de tolos díes a l'alcordanza de la infancia y la naturaleza.
Mª Esther García López ye maestra, llicenciada en Pedagoxía y Esperta en Filoloxía Asturiana. Tien escrito abondosu material didáuticu pa la enseñanza de la llingua asturiana, y nos últimos años vien descubriéndose como una de les voces más vives de la poesía asturiana con llibros como: ""L.luribaga"" (2003), ""Tiempu d'Iviernu""(2005), y el más nuevu ""Faraguyas (haikus)"" (2007).

D'otru llau, ""L'aventura de Minho"" ye un averamientu al xéneru de la fantasía épica nun autor, Abel Martínez González, que vien apaeciendo, al traviés de la so participación en dellos concursos de narrativa como'l del Centru Asturianu de Madrid nel qu'algama'l primer premiu; como una de les voces más moces y novedoses del panorama lliterariu n'asturianu."