El Camín de Santiago per Asturies acoyó’l pasu de 29.410 pelegrinos

El númberu de persones que caleyaron el Camín de Santiago peles rutes asturianes medró un 7,8 por cientu nel 2016 en comparanza col añu anterior. 29.410 pelegrinos percorrieron Asturies pel itinerariu de la mariña, el favoritu de los caminantes, o’l Primitivu.

Éstos son los datos apurríos pola Oficina de Acollida ao Peregrino, de Santiago de Compostela. La meyor medría diose nel camín de la mariña, con un aumentu del 9,5 por cientu al rexistrar 17.312 pelegrinos, mentes que nel Primitivu, caleyáu por 12.098 persones en direición a Galicia, foi del 5,4 por cientu.

Les estadístiques del Centru d'Información Turística del Principáu d'Asturies (CITPA) reflexen que'l perfil del pelegrín respuende a una persona d'ente 30 y 60 años d'edá (58,3 por cientu de los encuestaos) que percuerre'l camín mayoritariamente a pie (92 por cientu) y emplega’l so móvil y tableta nun 69 por cientu de los casos, anque solo'l 34,5 por cientu utiliza aplicaciones específiques de la ruta pa guiar el so itinerariu. El 39,4 por cientu empecipia'l camín pol so valor cultural, mentes que’l 24,9 por cientu tien motivos relixosos.

Mentes, el 68 por cientu de los pelegrinos entrevistaos n'Uviéu empezó'l so itinerariu n'Asturies y la mayoría optó por dormir n'albergues (58,1 por cientu). Namái un 4,8 por cientu escoyó un hotel pa pasar la nueche.

No que respeuta al so orixe, la metá de los pelegrinos procedía del estranxeru y 3 de cada 4, de países europeos. Italia lidera'l llistáu de visitantes internacionales, con un 15,7 por cientu de los encuestaos, siguida por Francia (9,9), Reinu Xuníu (8,3), Polonia (7,4), Alemaña (6,6) y Estaos Xuníos (5).