Xuristes denuncien que la política europea d'inmigración ye "xenófoba"

"El Grupu d'Estudios de Política Criminal (GEPC) definió como ""xenófoba"" la política europea en materia d'inmigración y denunció que la Direutiva de Retornu que va votase en Bruseles el próximu día 18 ""reduz a nada'l valor de la llibertá al permitir l'internamientu durante 18 meses"" de los inmigrantes clandestinos.

""La dignidá de la persona nun depende de los sos papeles, y muncho menos, l'ausencia d'éstos, pue ser constitutiva de delitu"", destaca esti grupu de xuristes de perfil progresista.

Los xuristes señalen que l'actual deriva de la ""política criminal europea"" en materia d'inmigración ""básase en criterios y oxetivos qu'espeyen el so raigañu xenófobu y la so abierta contradicción colos principios de los sistemes penales democráticos"".

El GEPC, del que forma parte'l vocal del Conseyu Xeneral del Poder Xudicial Félix Pantoja, alvierte de que ""una llectura simplificadora y parcial del fenómenu migratoriu termina por identificar los conceutos d'inmigrante y delincuente"", lo que lleva a la ""espansión de modelos político-criminales d'emerxencia"". ""Nesos modelos, l'apellación al peligru que representa una minoría ye'l pretestu pa violar principios elementales nel Estáu de Derechu"", denuncien los xuristes, pa los que ""mientres les cifres prueben qu'esi peligru ye irreal o ensin importancia, y que les propies minoríes presentaes como peligroses son sólo frutu d'un etiquetáu xenófobu, foméntase una falsa ideoloxía de la seguridá"".

Pal GEPC, nel sistema penal español y tres les reformes llegales del añu 2003, esta falsa ideoloxía ""supunxo una negación de principios como'l de llegalidá, el de 'lesividá', el de culpabilidá, el de xurisdicionalidá o'l de reintegración"". ""Los vientos qu'agora mos vienen d'Europa emburrien nesa direición represiva, que desconoz los oríxenes, la naturaleza y los efeutos de los fenómenos migratorios, amás de fomentar el sentimientu d'inseguridá, la xenofobia y la insolidaridá"", denuncia'l colectivu."