UXT y CC.OO piden que les fuerces polítiques lleguen "lo antes posible" a un alcuerdu sobre l'Estatutu

"Los secretarios xenerales d'UXT y CC.OO, Justo Rodríguez Braga y Antonio Pino, falaron esti miércoles de la necesidá de que les fuerces polítiques ""lleguen lo primero posible a un alcuerdu"" no tocante a la reforma estatutaria, porque, dende'l so puntu de vista, ""hai otros problemes sobre la mesa"" que tamién necesiten atención y trabayu.

""Nun debería allargase nel tiempu'l consensu ente les fuerces pa poder algamar un alcuerdu enantes del branu"", dixo Rodríguez Braga. Estes pallabres fueron soscrites por Antonio Pino, qu'afirmó que ye necesario que la reforma del Estatutu fine lo primero posible, pa que se ponga atención y se resuelvan otros problemes, como la crisis económica.

Braga y Pino aconceyaron colos representantes d'IX-BA-LV p'analizar la marcha de la ponencia estatutaria, los avances y los aspeutos qu'entovía queden por tratar. Nesti sen, dambos sindicatos reclamaron ""consensu coles fuerces polítiques y cola sociedá"". El cabezaleru d'UXT indicó que ""nun se pue entender una reforma ensin l'acuerdu col PP, pero tampoco diba ser llóxico dexar de llau y nun cuntar col apoyu d'IX"". Y ye que'l secretariu d'IX, Jesús Iglesias, indicó que ""la so coalición nun pue falar de los plazos y ritmos de la reforma, porque éstos tán marcaos polos alcuerdos ente PSOE y PP"".
Nel aconceyamientu quedaron clares les coincidencies ente les dos organizaciones sindicales y IX no que cinca a dalgunos de los aspeutos que tien de recoyer la reforma estatutaria. Asina, toos tán d'alcuerdu en que l'Estatutu tien d'espeyar la reconocencia del valor del diálogu y la concertación social, asina como la participación institucional de les organizaciones sindicales. ""L'Estatutu que surda de la reforma tien de contemplar la promulgación d'una llei de participación institucional de los axentes sociales, dalgo que yá pasa n'otres comunidaes"", dixo Pino.

Pela so parte, el representante de Bloque por Asturies, Rafael Palacios, afirmó que la so agrupación yá llevó una ""primer deceición"" al saber qu'Asturies nun va cuntar con un nuevu estatutu, sinón que va reformase ""ún vieyu"", colo que los asturianos ""van siguir siendo ciudadanos de segunda""."