Air Berlín alcuerda finalmente'l fomentu del catalán nos sos servicios

"Air Berlín aconceyará finalmente cola Direición Xeneral de Política Llingüística del Gobiernu baliar p'alcordar midíes que potencien el catalán nes rellaciones de la compañía colos sos veceros, col envís de ""trabayar en comuña"" na ""normalización llingüística"" y poder ufiertar ""el meyor serviciu"" a los ciudadanos que vuelen cola aerollinia alemana.

Ésti foi'l compromisu adoptáu pol direutor de la compañía n'España y Portugal, Álvaro Middelmann, dempués de mantener un aconceyamientu col presidente del Gobiernu, Francesc Antich, na que dieron por ""pesllada"" la polémica surdida nes caberes selmanes.

La direutora xeneral de Política Llingüística, Margalida Tour, unviara-y una carta al presidente d'Air Berlín, Joachin Hunold, convidándolu a usar el catalán na atención personalizada a los veceros, la documentación escrita, la páxina web y les instrucciones que comunica nel avión. Al final del alcuentru, Middelmann comprometióse a que ""dalgún día"" llegará a usase'l catalán nos aviones d'Air Berlín, si bien calculó ""complexu y difícil"" dexar afitada una fecha concreta. Sicasí, recordó qu'anguaño, 38 de los más de 200 emplegaos d'esta compañía yá son catalanoparlantes, demientres que nel 90 por cientu de los vuelos hai, polo menos, una persona que fala español.

El direutor d'Air Berlín pa España y Portugal sorrayó que la compañía tien un ""respetu absolutu"" pa cola cultura mallorquina y balear y, nesi sen, llamentó la interpretación que se fizo del editorial escritu por Hunold na revista ""Air Berlín Magazin"" denunciando que'l castellán camudó nes islles nuna ""llingua estranxera más"", yá que, según sorrayó, ""lo último que quería yera ofender"".

Per otru llau, Middelmann anunció que ta previsto que'l presidente d'Air Berlín se tresllade nes próximes feches a Mallorca pa tratar col Gobiernu asuntos de ""interés común"", anque precisó que nun ta previsto que vaya a participar nel citáu aconceyamientu cola Direición Xeneral de Política Llingüística."