Grupos ecoloxistes soliciten información sobre'l dragáu nel Puertu d'Avilés

"El Coleutivu Ecoloxista d'Avilés y el Grupu d'Ornitoloxía Mavea solicitaron-y al Ministeriu de Mediu Ambiente, Mediu Rural y Marín, información sobre l'estáu de la tramitación ambiental del dragáu del Puertu d'Avilés, ""que s'anuncia pa la próxima selmana cuando entovía nun se tramitó l'autorización ambiental imprescindible pa la obra, al afeutar a dellos de los espacios y especies protexíes"".

Según señalaron fontes de les organizaciones ecoloxistes nuna nota de prensa, ""nun se pue entamar col dragáu hasta que nun tengan una autorización ambiental que tien de venir precedida d'una información pública y retrucar d'un mou afayadizu a les alegaciones que se presenten"".

Asina mesmo, apuntaron que la zona prevista de vertíos del material de dragáu sería énte la Península de San Xuan de Nieva. ""Gran parte de los que se quier dragar son llodos contaminaos por metales pesaos, que se quieren echar na mar col impactu que vendría darréu"", criticaron.

Asina, y al considerar l'impactu del dragáu nel espaciu natural, los ecoloxistes recuerden que pa concede-yos les autorizaciones pa la extracción d'áridos fai falta ""cuntar cola evaluación de los sos efeutos sobre'l dominiu públicu marítimu-terrestre, no que cinca tanto al llugar d'extracción o dragáu como al de descarga nel so casu"". Asina, ""va salvaguardase la estabilidá de la playa, considerándose preferente les sos necesidaes d'aportación d'áridos"", afirmen.

Por too ello,tanto'l Coleutivu Ecoloxista d'Avilés como'l Grupu d'Ornitoloxía Mavea esperen que'l Ministeriu de Mediu Ambiente ""frene les irregularidaes que quieren siguir cometiendo nel Puertu d'Avilés con esti nuevu dragáu""."