Alonso anuncia la creación del Premiu de Teatru Profesional n’Asturianu

El conseyeru d’Educación y Cultura, Genaro Alonso, anunció na Xunta Xeneral la creación del Premiu de Teatru Profesional n’Asturianu. La Direición Xeneral de Planificación Llingüística y Normalización ta trabayando na so convocatoria próxima.

En respuesta a una entruga plantegada nel Plenu pol diputáu popular Pedro de Rueda sobre qué midíes piensa adoptar el Gobiernu pa impulsar el teatru en xeneral y la industria teatral, en particular, Alonso afirmó que’l compromisu del Executivu col teatru “ye indiscutible”, pa lo que citó les ayudes económiques direutes al Circuitu de les Artes Escéniques, la preocupación por renovalu y reforzalu, y el plantegamientu a iniciatives nueves en torno al sector. Asina, cuantificó en 588.109 euros les ayudes al teatru asturianu al traviés d’un programa que implica a 25 conceyos, 45 compañíes y cerca de 300 representaciones.

“L’impulsu económicu al circuitu nun ye l’únicu que recibe’l teatru asturianu dende’l Gobiernu”, añadió citando los 223.420 euros recibíos pol sector nel 2016 al traviés de les llinies de concurrencia competitiva pa producción, movilidá y proyeutos d’interés nacional, l’Axenda Didáutica, les ayudes a la producción en residencia o la contratación d’espectáculos dientro del programa ‘Vamos’ de la Llaboral Ciudá de la Cultura. Una llista a la que pronto va sumase’l Premiu de Teatru Profesional n’Asturianu, nel que ta trabayando la Direición Xeneral de Planificación Llingüística y Normalización.

No que respeuta a la llingua asturiana, el conseyeru tamién se refirió a l’Axenda Escolar 2017, anguaño en tramitación, qu’inclúi la programación de representaciones teatrales y cuentacuentos nos centros educativos pa los escolinos y escolines de Llingua Asturiana y Gallego-Asturiano.

Semeya obra d'Armando Álvarez.