La Oficina Municipal de la Llingua de Xixón entrega los premios del concursu ¡Ruempi la Mollera!

"Esti martes 10 de xunu la Oficina Municipal de la Llingua de Xixón entregaba los segundos premios del concursu-xuegu ¡Ruempi la Mollera!, nel que participaron les escolines y escolinos de llingua asturiana del segundu ciclu de Primaria de les escueles de Xixón.

El concursu diba empobináu a que los neños y neñes conocieren dalgo más de la historia, curiosidaes y personaxes del conceyu nel que viven. Nesta edición participaron un total de 573 escolines y escolinos de 16 escueles del conceyu, quedando ganador el C.P. Antonio Machado. El segundu puestu fue pal C.P. Laviada y el terceru pal Colexu San Lorenzo. El C.P. Severo Ochoa recibió un accésit.

Darréu de la entrega de los premios inaguráronse dos esposiciones que van poder visitase na segunda planta del Centru Cultura Antiguu Institutu. Na primer d'elles amuésense tolos trabayos que participaron nesta segunda edición del concursu ""Ruempi la Mollera"", demientres que la segunda, ""MªTeresa González, una collacia ente nós"", ta centrada na figura de Mª Teresa González, autora a la que se-y dedicó esti añu la selmana de les lletres. Asina mesmo tamién foi MªTeresa l'oxetu de la primer entruga que se-yos fizo a los neños y neñes nel concursu, amosándose nesta esposición un montaxe colos meyores trabayos presentaos, na que se recueye la vida y obra de l'autora de Tremañes.

Nel actu d'entrega de premios proyectóse un Power Point con un resume de tolos trabayos presentaos y una esplicación de les entrugues que se ficieron nesti cursu escolar. Tamién actuaron dos actores del grupu La Mustadiella que punxeron una nota de bon humor y ficieron que l'actu fuera dinámicu y divertíu."