Bermejo afirma que "sacar l'albuertu del Códigu Penal nun ye la opción del PSOE"

"El ministru de Xusticia, Mariano Fernández Bermejo afirmó énte'l Plenu del Senáu que ""lo que tenga que cambiase, habrá que cambialo"" no tocante a la llei que regula la interrupción voluntaria del embaranzu (IVE) y matizó que ""sacar l'albuertu del Códigu Penal"", si bien ye una opción, ""nun ye seguramente la del PSOE"".

Respondiendo a les entrugues del senador progresista catalán, Jordi Guillot Miravet, qu'apostó pola eliminación de la Llei reguladora y la despenalización del albuertu, Bermejo señaló que la llexislación vixente ""funcionó bastante bien tou esti tiempu"", y, si bien ""nenguna llei tien de ser eterna"" les posibles igües tienen de considerase nun momentu de ""reflexón serena"".

""Camiento que l'análisis serenu de la situación fuera d'esos momentos cíclicos onde de sutrucu esa llei se pon en cuestión, y que suel coincidir colos periodos electorales, ye un bon momentu pa, ente toos, trazar el nuevu camín"", apuntó'l titular de Xusticia.

""Quiero ver si la llei que tenemos cumplió'l so ciclu, ver si hai demanda social bastante pa iguala, quiero ver si tamos d'alcuerdu en qué ye lo qu'hai qu'iguar, quiero que'l derechu de les muyeres se faiga con plenes garantíes y quiero regular el derechu d'oxeción de los mélicos, que seguramente fai falta"", apuntó Bermejo, pa dempués sentenciar que ""ési ye'l compromisu del PSOE""."