Mieres aprueba una moción na qu’encamienta a Gobiernu y Xunta Xeneral a declarar la oficialidá

Faustino Zapico, conceyal d’IAS con IX en Mieres, presentó en comuña con Somos Mieres una moción pa encamentar al Gobiernu y a la Xunta Xeneral una reforma del Estatutu pa declarar la oficialidá. El PSOE astúvose y el PP votó en contra.

La llegada de la ‘Caravana de la Oficialidá’ a Mieres el sábadu fixo que l’equipu de gobiernu d’Izquierda Xunida (IX) pautara con Somos Mieres la presentación d’un moción pela vía d’urxencia qu’encamentara la declaración d’oficialidá. Pa ello, aprovecharon la proximidá de la convocatoria de la Xunta pola Defensa de la Llingua Asturiana (XDLA) col Plenu mensual, que se celebra’l xueves caberu de cada mes.

Tres l’alderique previu a la votación de la moción, nel que’l PSOE y el PP refugaron participar, celebróse ésta col resultáu de 14 votos (12 d’IX y 2 de Somos Mieres), 3 en contra (los del PP) y 3 astenciones (del PSOE, que contó cola ausencia d’un conceyal). Asina, el Conceyu de Mieres encamienta al Gobiernu y la Xunta Xeneral a reformar l’Estatutu pa declarar la oficialidá del asturianu.

Esplicación de voto

El PSOE y el PP pese a nun participar nel debate nel que Zapico esplicó los motivos que llevaron a la presentación de la moción, asina como les recomendaciones y aspeutos llegales pa la reconocencia de la oficialidá, sí quixeron dar esplicación de votu, una manera d’evitar el derechu de réplica esistente nel aderique previu a la votación. “El PP utilizó l’argumentu yá gastáu de qu’hai más coses nes que gastar el tiempu, mentes que’l PSOE señaló que la reforma del Estatutu debería d’entamase pa tocar más coses que la oficialidá”, esplicó l’edil d’Izquierda Asturiana (IAS).

Otra manera, nel mesmu día del Plenu, los conceyales d’IX y Somos Mieres posaron cola pancarta de ‘Conceyos pola Oficialidá’ énte la Casa Conceyu. El baberu encolingaríase de la fachada del edificiu con motivu de la ‘Caravana pola Oficialidá’ del sábadu, na que participaron decenes de vehículos nuna ruta dende Cabanaquinta a Mieres, previu pasu per Campumanes.