Les escritores van protagonizar la XXXVIII Selmana de les Lletres Asturianes

La XXXVIII Selmana de les Lletres Asturianes va celebrase del 2 al 9 de mayu y va centrase na lliteratura n’asturianu y gallego-asturiano fecha por muyeres. Educación y Cultura va editar un llibru con testos d’escritores asturianes del sieglu XVIII hasta anguaño.

D’esta forma, tres una edición que nun taba dedicada a un escritor o temática, la conseyería recupera esti formatu pa la gran fiesta de les nueses lletres. Les escritores van ser les protagonistes de toles actividaes previstes y tamién del llibru especial d’esti añu que s’entrega de baldre nel Día de les Lletres Asturianes (vienres 5) pola merca de discos y llibros en comercios del to país, que nesa xornada cuenten con un 10 por cientu de descuentu.

Nesta xornada l’Academia de la Llingua Asturiana tamién celebra’l so actu institucional nel Teatru Campoamor y la sociedá civil va reclamar un añu más la oficialidá del asturianu y del gallego-asturianu peles cais d’Uviéu na manifestación que convoca la Xunta pola Defensa de la Llingua Asturiana.