L’añu 2016 comenzó con 95.800 persones ensin trabayu y finó con 67.300, según los datos de la Encuesta de Población Activa (EPA) del INE. Ello supón un descensu del paru del 29,78 por cientu n’Asturies, lo que-y convierte nel territoriu onde más menguaron porcentualmente les cifres de desemplegu nel añu últimu.
La tasa del paru n’Asturies, tres esti descensu de 28.500 ciudadanos ensin ocupación, asitiase nel 14,59 por cientu, siendo la media estatal de 18,63 por cientu. La meyor cifra preséntala Navarra (10,01 por cientu), siguida por La Rioja (10,90 por cientu) y Euskadi (12,27 por cientu), mentes que les peores rexístrense n’Extremadura (28,31 por cientu), Andalucía (28,25 por cientu) y Melilla (27, 38 por cientu).
No que respeuta a la variación añal, Asturies, con un 29,78 por cientu de mengua, ye’l territoriu con mayor descensu. Cantabria (26,71 por cientu) y Navarra (25,46 por cientu) siguen al nuesu país nesta llista que zarra Extremadura, con un aumentu del 0,63 por cientu; Euskadi, con un descensu del 4,73 por cientu; y Aragón (6,35 por cientu). La media estatal ye del 11,33 por cientu.
La nota negativa ye qu’Asturies cuenta cola tasa d’actividá más baxa del Estáu: 50,90 por cientu (la media estatal ye del 58,95 por cientu). Ello quier dicir que la metá d’asturianos y asturianes n’edá adulta nun trabayen.
Adxuntu | Tamañu |
---|---|
![]() | 82.5 KB |