El 91 por cientu de les quemes d'avientu del 2015 foron intencionaes

El supervisor de SEPA, Jesús Pallares, demanda más medios y afirma qu'esos socesos van volver a repetise.

Les Brigaes d'Investigación de Quemes Forestales del Principáu d'Asturies (BRIPAS) abrieron 56 informes y analizaron 9.343 hectárees, el 74,03 por cientu de la superficie total quemada nel país n'avientu del 2015. Esos análisis determinen que les quemes fueron intencionaes nel 91 por cientu de los casos, esto ye, que 9 de cada 10 tuvieron detrás la mano del home.

Estos datos foron daos a conocer ayeri pol Gobiernu na Xunta Xeneral na comisión parllamentaria qu'investiga estos socesos. Guillermo Martinez, conseyeru de Presidencia y Participación Ciudadana, defendio al Executivu, que, na so opinión, “movilizó y coordinó tolos medios disponibles pa facer frente a les quemes forestales d'avientu del 2015” y insistió que'l pais dispón de protocolos efeutivos, profesionales cualificaos y medios humanos y materiales abondos pa facer frente a les emerxencies.

Pallares, por contra, demandó güei más recursos y señaló que "les polítiques de prevención son ameyorables". D'igual forma, vaticinó que les quemes d'hai un añu y un mes van volver repetise nun futuru, gobierne quién gobierne, y afirmó que s'ha de camudar la opinión social de lo que ye'l fueu pa evitales.