L'Ayuntamientu de Llanes recurrirá la sentencia que torga'l so Plan Urbanísticu

"L'Ayuntamientu de Llanes recurrirá la sentencia del Tribunal Superior de Xusticia d'Asturies qu'anula'l Plan Xeneral d'Ordenación Urbana (PGOU) del conceyu.

Dende l'ayuntamientu asegúrase la disposición al ""consensu"" pa la ""revisión y adautación"" del plan, enfotándose nun pronunciamientu favoratible a les pretensiones formulaes tanto pola Alministración municipal como pol Gobiernu del Principáu, al traviés de la Comisión d'Urbanismu y Ordenación del Territoriu del Principáu d'Asturies (CUOTA), en tolos recursos xudiciales que ""interpunxere y va siguir interponiendo"".

El consistoriu respondía asina, al traviés d'un comunicáu, a la situación creada dempués de la nueva sentencia del TSXA por un recursu presentáu pola Asociación de Vecinos y Amigos de Llanes (Avall), que torgó otra vuelta'l PGOU, lo mesmo que lo ficiera n'abril del 2007 por una demanda d'Andecha Astur.

Asina, l'equipu municipal de gobiernu socialista señaló que nun-y sorpriende esta nueva sentencia tres el precedente de la formulada n'abril del 2007 pol mesmu tribunal. Los responsables municipales tresmitieron a los vecinos y a los sectores afeutaos, ""un mensaxe de tranquilidá"" nel sen de que va tomase les midíes llegales oportunes pa evitar la ""paralización"" del conceyu, promoviendo xunto a la sociedá llanisca en xeneral y la oposición institucional representada na sede de la corporación municipal un alderique ""seriu, rigurosu y tranquilu"" sobre la situación llegal, incluida una tramitación del procesu de revisión y adautación del actual PGOU de LLanes, aprobáu de recién nel plenu municipal celebráu'l pasáu 7 de mayu.
L'Ayuntamientu insistió na so propuesta de ""diálogu y consensu"" espresada hai unes feches ""ensin condiciones y ensin prexuicios"" pa favorecer el ""procesu económicu y social que merecen los llaniscos, asina como l'equilibriu y sostenibilidá que tien de presidir les nuestres aiciones""."