Air Berlín entama aiciones llegales escontra'l diputáu d'ERC Joan Puig por comparar a la compañía col nazismu

"Air Berlin entamará aiciones llegales énte la Unión Europea escontra l'ex diputáu d'ERC Joan Puig por comparar a la compañía col nazismu pola mor de la polémica surdida sobre l'usu de la llingua catalana nes rellaciones de l'aerollinia colos sos veceros, según confirmaron fontes d'Air Berlín , calificando de ""mui grave y inaceptable"" el comportamientu de Puig.
Dempués de que'l pasáu vienres Puig incluyera nel so blog una esvástica xunto al logotipu de l'aerollinia alemana, los servicios xurídicos d'Air Berlin tuvieron estudiando qué midíes tomar, siendo esti llunes cuando entamen los ""pasos necesarios"" pa presentar una denuncia escontra l'ex diputáu ante les instituciones europees.

Según señalaron les mesmes fontes son esti episodiu ""removiéronse firíes que tovía nun tán curaes"" ente la sociedá alemana, polo que la compañía ""nun ta dispuesta a aceptar"" esti tipu de socesos.

La polémica entamó a partir d'una carta qu'unvió la direutora xeneral de Política Llingüística del Gobiernu Balear, Margalida Tous, a Air Berlín (asina como a otres aerollinies) encamentándo-yos a potenciar el catalán nes sos rellaciones colos veceros, una recomendación que nun sentó bien a la compañía, que considera que ""nun tien sen"".

Dende Air Berlin recordaron l'importante volume de turistes que viaxen a les Islles Baliares cola compañía al final del añu, polo que dixeron ""nun entender"" por qué dende'l Gobiernu se preocupen por una cuestión como ésta, cuando hai ""otres prioridaes"" muncho más relevantes. Nesti contestu, sorrayaron que n'España hai ""otres llingües cooficiales que merecen tol respetu"", pero que la compañía nun usa, y defendieron ""el derechu d'una empresa privada internacional"" a espresase cómo-y pete.

Pese a la polémica, afirmaron que les rellaciones col Gobiernu balear ""nun van vese afeutaes"", pero recalcaron que ""diba ser bien recibida"" una disculpa, y añadieron de siguío qu'insistir nel tema de la llingua ye ""volver con un alderique medieval ensin nengún sen"", nun momentu tan delicáu pa la economía española.

Nel casu de Puig, sicasí, insistieron en que ye ""intolerable dafechu"" aludir a un fechu históricu tan ""grave"" como'l nazismu, que provocó graves firíes na sociedá alemana, razón pola qu'estimen ""necesario"" treslladar estos fechos ante la UE.
Volviendo a la carta de la direutora xeneral de Política Llingüística señalaron que (la conveniencia de potenciar o non el catalán) ye una ""opinión personal"" que ""nun tien llugar"" si se tienen en cuenta les estreches rellaciones ente la compañía y la comunidá balear. De la mesma manera, precisaron que ""hubo contautos constantes con miembros del Gobiernu balear sobre esti tema"", anque ensin precisar si intervino'l propiu presidente del Gobiernu, Francesc Antich, qu'anunció'l pasáu vienres que mantendrá un alcuentru col direutor de la compañía n'España y Portugal, Álvaro Middelmann."