Más de mil persones yá dieron la cara pola Oficialidá

"El Conceyu Abiertu pola Oficialidá (CAO) tien recoyíes más de 1.000 semeyes na so campaña "doilacara.net" qu'entamara'l martes pasáu cola so presentación énte la Xunta Xeneral del Principáu, y que recueye imáxenes de persones portando'l cartel col mensaxe '""yo doi la cara pola oficialidá/au dou a cara pola oficialidá"".

Esta mañana, y coincidiendo con un nuevu conceyu de los miembros de la ponencia del Estatutu d'Autonomía, el colectivu convocó otra rueda de prensa pa informar de los oxetivos de la campaña y el grau de siguimientu de la mesma. Asina mesmo un grupu de persones colocóse a la entrada del edificiu de la cámara cola pancarta oficial de la campaña, acompañaos por dos gaiteros.

Ernesto Avelino Suárez, voceru de la Xunta pola Defensa de la Llingua Asturiana, informó de que na páxina web ""doilacara.net"" hai yá xubíes más de 500 semeyes, y qu'a lo llargo d'esta selmana van ser más de 1.000, una vez se sumen les que yá llegaron a la direición del corréu electrónicu doilacara@gmail.com.

Anunció tamién que paralelamente van desarrollase nos próximos díes otres campañes nes que van mostrar el so apoyu al movimientu ""non sólo yá la ciudadanía, sinón persones mui importantes del mundu de la cultura, les artes y la lliteratura"".

Al empar esplicó que la campaña ye un ""actu simbólicu col que queremos amosar que n'Asturies hai un apoyu claru a la oficialidá"". Añadiendo que ""estos actos, a hores tan difíciles, valen pa dexar claro que'l movimientu nun va parar de pidir lo que ye de xusticia"".

Suárez afirmó que ""nestos momentos, dientro de los partíos mayoritarios"", en referencia a PSOE y PP, sabemos que ""hai munchos militantes y dirixentes de les dos organizaciones que tán a favor de la oficialidá de la llingua asturiana, y queremos dicir que, a la escontra de lo que dicen dalgunos miembros de la FSA, a favor de la oficialidá hai muncha xente del partíu y lo mesmo pasa col PP"". ""Queremos que quede claro que ye dalguna parte de la Federación Socialista Asturiana la que caltién esta postura cerril escontra de la oficialidá"", finó."