El derbi asturianu de Segunda B, en llingua asturiana en RTPA

El Lealtad-Caudal del domingu va emitise n'asturianu na TPA. Tamién va poder sentise en llingua asturiana na radio pública.

La direición xeneral de RTPA confirma asina'l so compromisu d'emitir de manera periódica partios de futbol en llingua asturiana en TPA y va televisar n'asturianu el derbi de Segunda División B que va tener llugar en Les Caleyes el domingu al meudíu. El campu maliayu acoyía'l pasáu 18 d'avientu un Lealtad-Coruxo que pasaba a la historia por ser el primer eventu futbolísiticu que se sentía n'asturianu nos diez años de vida de la canal.

Miguel Fernandi va encargase otra vuelta de comentar el partíu na TPA xunto con Nacio González, mentes que na RPA va facer lo propio Fernando García de Dios. Al mesmu lleguen dambos conxuntos con dinámiques bien diferentes. El Lealtad engancha una serie de bonos resultaos que se confirmó col trunfu nel campu de l'Arandina na tarde d'ayeri por 0-2, mentes que'l Caudal vien de dos derrotes siguíes, la última nel Hermanos Antuña énte un rival direuto pola permanencia como'l Burgos (1-2). D'esta manera los d'Iván Ania igualen a puntos col Mutilvera, qu'ocupa la plaza de play-off de descensu.