El Bloque por Asturies acusa al Principáu de tar faciendo una política "liquidacionista" en cuenta de "llingüística"

"El sábadu día 7 de mayu'l Bloque por Asturies ofrecía una rueda de prensa na que ponía enriba la mesa les deficiencies amosaes pol Gobiernu del Principáu en materia de política llingüística. La formación, qu'integrada na coalición formada tamién por Izquierda Xunida y Los Verdes, participara del pautu de gobiernu alcordáu col PSOE d'Asturies na llexislatura pasada, acusa al gobiernu de facer una política ""liquidacionista"" pa cola llingua.

D'esti mou, y en primer llugar, comparen los llogros algamaos pola so coalición cola política d'anguaño, valorando que'l Gobiernu asturianu atopase nun ""procesu d'involución, de regresu al pasáu, de liquidación de tolo fecho na llexislatura pasada"", siendo'l so oxetivu la ""liquidación de la llingua asturiana"".

Asina, denuncien la desapaición de les rotulaciones n'asturianu de los edificios alministrativos, lo mesmo que los logotipos, o les campañes de comunicación institucionales de calter billingüe. Al empar, critiquen l'ausencia de valoración del Plan de Normalización del Asturianu de la pasada llexislatura, sorrayando amás que ""entovía nun se formuló ún nuevu"".

No que cinca a la normalización llingüística faese notar el fechu de qu'ésta ""consiste en confundir, interesadamente, promoción cultural con normalización llingüística"", denunciando sobre manera la precariedá de los Servicios de Normalización Llingüística nos Conceyos. Nesti sen sorrayen que ""ye fundamental que los servicios tengan continuidá durante tol añu pa que los téunicos puean planificar el trabayu"" y qu'éstos ""cuenten con una estabilidá presente nos propios organigrames de los Conceyos"".

D'otru llau, y no tocante a la situación de la llingua asturiana nel ámbitu educativu, Bloque por Asturies recuérda-y a la Conseyería d'Educación "" la obligación d'ufiertar en tolos centros educativos les asignatures de Llingua Asturiana y Gallego-Asturianu"", faciendo amás ""un siguimientu seriu de la situación nos centros privaos y concertaos"".

Asina, y poniéndo-y el puntu al escritu, el Bloque por Asturies convida al Gobiernu asturianu a que-y ponga fin a la so política de ""Apartheid llingüísticu"", considerando ""intolerable"" que ""en plenu sieglu XXI un país européu vulnere los derechos humanos y los derechos democráticos de los sos ciudadanos y ciudadanes""."