UITA asegura que'l siguimientu de la fuelga de tresporte ta siendo "masivu" n'Asturies

"El presidente de la Unión Independiente de Transportistas Autónomos (UITA), José Fernández, aseguró esti llunes que'l siguimientu de la fuelga de tresportes nel Principáu ta siendo masivu"". Fernández aseguró que nun hai más que salir a les carreteres va ver que ""namás circulen dalguna furgoneta pequeña de repartu de les que faen pequeños percorríos"".

Fernández indicó que nos puntos estratéxicos d'Asturies, como por exemplu'l puertu d'El Musel, en Xixón, nun se rexistra movimientu dalu. Asina mesmo esplicó que nun tán produciéndose incidentes pese a qu'hai ""piquetes informativos"".

El presidente d'UITA criticó otra vuelta a los sindicatos mayoritarios asegurando que'l prealcuerdu qu'anunciaron la pasada selmana colos cargadores ta ensin roblar entá. ""Ye un prealcuerdu qu'amás ye papel moyao porque ta venceyáu a les negociaciones que se produzan en Madrid"", sorrayó José Fernández.

El pasáu vienres les patronales mayoritaries del tresporte de mercancíes per carretera d'Asturies, Asetra y Cesintra, roblaron un prealcuerdu colos cargadores sobre les condiciones que tienen de siguir los futuros y presentes contratos de tresporte, que tendrá de ser confirmáu por tolos muérganos representativos, tanto de les empreses cargadores como de los sindicatos enantes del próximu día 11. Esti alcuerdu ""garantizaba la normalidá del tresporte de mercancíes per carretera n'Asturies"", al marxe de los paros convocaos por otres organizaciones a nivel nacional"" según aseguraron nesi momentu los presidentes de dambes organizaciones."