Costa nun presentará candidatura alternativa

"El diputáu del PP Juan Costa nun va presentar candidatura alternativa a la de Mariano Rajoy. Sicasí, defende que ye ""necesario un nuevu lideralgu"" nel partíu que seya ""quién a ganar"" al PSOE nes próximes elecciones, destacando la necesidá de cambiar dalgunes coses nel partíu, ente otres, que los militantes participen ""de manera direuta na elección del presidente nacional"".

Nuna entrevista publicada nel diariu ""El Mundo"", l'ex ministru asegura que se plantegó ""seriamente"" la posibilidá de presentar una candidatura al Congresu, dedicándose a ello con ""tiempu, responsabilidá y muncha ilusión"".

Sicasí, camienta que ""la dinámica del Congresu y l'apoyu a Mariano Rajoy de munchos compañeros y de los compromisarios que representen lo desaconseyen"". Asina, reconoz que ""nestos momentos, ye difícil algamar los avales pa una candidatura alternativa"". De fechu, Costa nun confía en qu'haya ""nenguna llista alternativa"" a la del actual presidente del partíu y asegura que nunca-y pidiera'l so apoyu a dirixentes como José María Aznar, Rodrigo Rato o Jaime Mayor, porque ""son un referente pa tol partíu"".

""Yo nun-yos pidiría a les persones que son nun referente pa tolos militantes del PP un apoyu públicu y personal. Les persones que son referente de tolos militantes tienen que sentise llibres y nun-yos diba pidir l'apoyu pa una candidatura concreta"", señala. Amás, esplica que, anque ""faló"" cola presidente de la Comunidá de Madrid, Esperanza Aguirre, nun-y pidió nunca ""apoyu esplícitu"" porque nun llegó a presentar la so candidatura."