Del Busto refuga l’aumentu del copagu farmacéuticu que Montserrat avanzó y que rectificó darréu

El Gobiernu nun sofita un aumentu del copagu farmacéuticu. Asina lo avanzó’l conseyeru Francisco del Busto tres conocer unes declaraciones de la ministra Dolors Montserrat nesi sen que darréu rectificó señalando que yera dalgo que sólo taba n’estudiu.

“Va en contra de la equidá del sistema sanitariu, recorta l’accesu de les persones a los fármacos que precisen a tenor del so nivel de rentes y supón un castigu a les persones más vulnerables que, a menudo, son mayores y pensionistes”, aseguró Del Busto, qu’afaló a la ministra a derogar el decretu d’abril del 2012 que camuda’l modelu de Sanidá y qu’esixe un esfuerciu económicu mayor a la ciudadanía, amás de resultar más gravoso pa les persones con mayor carga d’enfermedá que, con demasiada frecuencia, coinciden colos grupos sociales de menos renta, según apuntó. De siguió, el conseyeru defendió l’accesu universal y gratuitu a los servicios sanitarios públicos financiaos con impuestos como la forma más xusta de respetar el derechu a la proteición de la salú y a l’asistencia sanitaria ensin discriminación económica, derechu qu’inclúi tamién l’accesu a les melecines.

El llunes la ministra de Sanidá, Servicios Sociales y Igualdá nueva fixo nunes declaraciones a Ràdio 4, la emisora de radio de RTVE en catalán, nes que señalaba la so intención d’aumentar el copagu farmacéuticu a los pensionistes con ingresos mayores de 18.000 euros alegando l’ampliu tramu esistente (ente los 18.000 y 100.000 euros) como afita agora la norma cola fin “de que pague más el que más tien”. Hores depués rectificaba con un tweet y señalaba darréu que yera dalgo que taba n’estudiu y qu’ello nun significaba que fora a facese.

Epidemia de gripe

Asturies ta viviendo estos díes la mayor epidemia de gripe de los 8 años últimos, lo qu’obligó a Sanidá a movilizar a tolos médicos disponibles. La ocupación de los hospitales supera’l 95 por cientu de media y les operaciones non urxentes suspendiéronse nel HUCA pel momentu.