El CAO plánta-yos cara a los miembros de la ponencia estatutaria

"El Conceyu Abiertu pola Oficialidá aconceya otra vuelta énte la Xunta Xeneral coincidiendo cola xunta de la ponencia estatutaria formada polos grupos con representación nel parlamentu asturianu.

La convocatoria ye pal llunes 9 de xunu a les 10.45 hores, aprovechando la ocasión la organización pa colocar una mesa informativa sobre la campaña ""Doi la cara"", iniciativa que ta teniendo perbona acoyida per parte de la sociedá asturiana. Amás, ufiertarán a tola xente interesao, la posibilidá de retratase cola conseña de la campaña, al empar qu'ufren información sobre la situación de la llingua asturiana y los oxetivos del Conceyu Abiertu pola Oficialidá.

""Doilacara.net"" foi presentada'l pasáu martes col envís de recoyer ""l'apoyu de miles de persones"", posibilitando esti oxetivu'l fechu de que la campaña durará'l tiempu que dure la ellaboración del testu estatutariu. Pel momentu'l númberu de semeyes recoyíes perpasa les trescientes en menos d'una selmana.

El CAO recordó amás, al traviés d'esta convocatoria, la ""oportunidá histórica"" na que nos atopamos cola redaición del nuevu testu estatutariu pa la reconocencia de los derechos llingüísticos de los falantes d'asturianu y gallego-asturianu n'Asturies."