La Xunta'l Principáu aprueba la continuidá de Pérez Ornia como direutor xeneral de RTPA

"La Xunta Xeneral del Principáu aprobó esti vienres, colos 40 votos que sumaron PSOE y PP, la renovación de José Ramón Pérez Ornia como direutor xeneral del Mediu Públicu de Comunicación del Principáu d'Asturies, qu'axunta la Radio y la Televisión del Principáu d'Asturies (RTPA). La candidatura d'Ornia, del Grupu Socialista, foi la única presentada.

Los cuatro diputaos d'IX-BA-Verdes, por embargu, escribieron nes sos papeletes un ""Non"" qu'a la fin contó como votu nulu. Soscribieron asina'l so refugu, na llinia de les crítiques a la xestión d'Ornia qu'espresara'l diputáu Francisco Javier García Valledor.

Previamente, aprobóse'l dictame sobre les compatibilidaes del candidatu, cola astención d'IX.

Más tarde, nos pasiellos de la Xunta y en declaraciones a los periodistes, el voceru del PSOE, Fernando Lastra, amosó la so sorpresa énte la posición d'IX y dixo que se ""automarxinara"" en tol procesu porque siquiera propunxo una candidatura alternativa.

Refugó amás les crítiques que-y ficiera'l xueves Valledor, no que cinca a una supuesta manipulación, y dixo que suponen una falta de respetu a los trabayadores del mediu, que seríen en tou casu los supuestamente manipulaos."