El Gobiernu aporta 6,7 millones pa l’ampliación de capital de la RTPA

El Conseyu de Gobiernu aprobó destinar a cargu de los presupuestos prorrogaos del 2016, los 6,7 millones d’euros que demandaba la direición xeneral de la RTPA pa quitar la deuda vencida. Podemos critica que l'Executivu de la FSA tomara esta decisión de “de manera furtiva”, ensin llevalo a la Xunta Xeneral.

Nuna información asoleyada por ‘Europa Press’ confirmaben dende’l Gobiernu el preste a esta partida de 6,7 millones d’euros que reclamaba la direición xeneral de la RTPA, encabezada por Antonio Virgili, p’abonar la deuda vencida y evitar entrar en causa de disolución nun futuru próximu. Zebra, con 3 millones, y Asturmedia, con 1,4 millones, yeren les dos empreses con cantidaes mayores por cobrar.

Esta decisión, sicasí, nun se fixo pública na rueda de prensa que sigue a les reuniones del Conseyu de Gobiernu, lo que provocó les crítiques de Podemos. Asina, Daniel Ripa, secretariu xeneral de la formación morada, acusó al Executivu de la FSA d’aprobar estar partida “de manera furtiva” cola fin d’evitar el so alderique na Xunta Xeneral.

Pela so parte, Ramón Argüelles, coordinador xeneral d’Izquierda Xunida, sí defendió esta ampliación de capital que, na so opinión, permite favorecer la operatividá de la RTPA.

“Diez años contra la llingua y cultura asturiana”

La noticia d’esta aportación a la RTPA, a la qu’hai que sumar una tresferencia de 20 millones del Gobiernu que contempla’l presupuestu del ente públicu de comunicación del 2017, llega un día depués del asoleyamientu por parte de la Xunta pola Defensa de la Llingua Asturiana (XDLA) d’un comunicáu entituláu ‘Diez años conta la llingua y cultura astruriana” nel qu’esti coleutivu, per primer vegada, pon en dulda la conveniencia de caltener les emisiones de la televisión y la radio pública. “Ye'l momentu de facer un llamáu a la sociedá asturiana pa que reflexone sobre si tien sentíu manteneles, amás de pagar la deuda xenerada polos sos xestores”, apunta la organización cívica.“Estos medios nun son más qu'una ferramienta de sustitución llingüística y d'aculturación”, argumenta la XDLA, qu’afirma que los diez años de la RTPA foron de “munches sombres y mui poques lluces” no que tien que ver “col compromisu que marca la llei cola difusión de la llingua propia”. “L'asturianu namás val pa les pingarates, pa da-y un toque de color y d'humor a una emisora que bien podría emitir dende Madrid –por muncho que nos echen en cara que de vez en cuando van peles caleyes, como si eso yá valiera pa xustificar la so existencia– ”, añade al empar que denuncia la falta de respetu a la toponimia oficial, l’ausencia d’una programación infantil y l’usu diglósicu del idioma, y qu’alerta de la baxada destacada de les audiencies.

“Los asturianos –los pocos que vemos y sentimos RTPA– asistimos plasmaos a una televisión onde l'usu del idioma ye, amás de marxinal, diglósicu, vulgar y centráu no folclórico. Nel casu de la radio, l'asturianu apaez como pingarates a lo llargo de la programación, mentes que la música nesti idioma paez nun existir. ¿Tien sentíu que paguemos una radio que ta pa poner lo mesmo que pue sonar en Cadena Dial o Los 40?”, entrúguense dende la organización cívica, que critica con dureza la posición de PSOE, PP y Izquierda Xunida, que “callen” énte’l llabor de la direición xeneral “gracies a unos puestos directivos nuevos a repartir a deu”.

“La RTPA funciona como'l güertu priváu d'Antonio Virgili y amigos, los que diseñen una programación con pocu o nengún interés, amás de mui baxa calidá”, sentencia la XDLA.