El Gobiernu renueva’l conveniu pa dar asistencia médica a emigrantes mayores de 65 años necesitaos en Venezuela

Al menos 72 emigrantes asturianos en Venezuela ensin seguru médicu van recibir asistencia nel casu de necesidá. El Gobiernu ta acabante de renovar el conveniu cola Fundación España Salud robláu nel 2014 y que permitió dar cobertoria a 82 persones.

La Conseyería de Presidencia y Participación Ciudadana va financiar nun primer momentu con 50.000 euros la prórroga d’esti conveniu, que podría ampliase nel futuru d’esistir disponibilidá presupuestaria, polo que se creará una llista de reserva de posibles beneficiarios. La partida aprobada supera en 10.000 euros a la que se destinaba anguaño.

L’Executivu asturiano y la Fundación España Salud firmaron a últimos del 2014 un alcuerdu de collaboración p’atender a los emigrantes asturianos en situación precaria y ensin asistencia sanitaria residentes en Venezuela, del que se beneficiaron 82 persones mayores de 65 años. La situación económica que vive’l continente sudamericanu y, en concreto, esti país, llevó al Gobiernu a intervenir pa garantizar l’atención a un grupu d’emigrantes que, pese a tener ingresos inferiores al salariu mínimu, quedaron escluyíos d’un conveniu d’ámbitu xeneral ente’l Ministeriu de Trabayu y Asuntos Sociales cola mesma fundación, tres perder la pensión asistencial.

Esti conveniu enmárcase dientro los exes del IV Plan de Emigración (2013-2016), que da prioridá a contribuyir a sufragar necesidaes básicas de subsistencia –agospiu, asistencia sanitaria y gastos farmacéuticos– de la población emigrante. Por ello, la Conseyería de Presidencia tamién caltién alcuerdos de calter asistencial con otres instituciones, ente elles el Club Tinetense de Buenos Aires y la Fundación Españoles en Brasil.

Nel primer casu finánciense 43 plazas residenciales pa personas mayores (130.000 euros), mentes que’l segundu alcuerdu permite atender nel so centru de día a 16 mayores dependientes (8.000 euros). También ta previsto’l desarrollu d’otro conveniu cola Fundación Centro Asturiano de Caracas pa dar apoyu sociosanitario continuu a emigrantes asturianos al traviés del so personal médicu y la so plantiya de trabayadores sociales.