Educación presenta una campaña pa potenciar la matriculación na asignatura de Llingua Asturiana

"La Conseyería d'Educación del Principáu d'Asturies cuenta superar nel próximu cursu escolar el 56% d'alumnos de llingua asturiana y gallego-asturianu en Primaria y el 21% n'Educación Secundaria, oxetivu pal que tien preparada una campaña de fomentu de la matriculación nesta asignatura.

Esta iniciativa foi presentada esti xueves en rueda prensa pol direutor xeneral de Recursos Humanos de la Conseyería d'Educación, Alberto Muñoz; la direutora xeneral de Promoción Cultural y Política Llingüística, Consuelo Vega; el coordinador de llingua asturiana de la Conseyería, Fernando Padilla Palacio; y la responsable de la Oficina de Política Llingüística, Maria Antonia Pedregal.

Muñoz esplicó que los oxetivos principales de la mesma son perpasar los 17.500 alumnos matriculaos nel pasáu cursu n'Educación Infantil y Primaria (dalgo más d'un 55%) y los 4.669 de Secundaria (dalgo más del 20%). El direutor esplicó que dende l'añu 2000 hai una tendencia creciente, polo que camienta que nun van tener problemes p'algamar esti oxetivu.
Con esti envís, el Principáu presentó una campaña de promoción que baxo la conseña ""Escoyer llingua asturiana ye conocer meyor Asturies/Escoyer gallego-asturiano é conocer miyor Asturias"" axunta'l repartu de 2.000 cartelos (1.800 n'asturianu y 200 en gallego-asturianu) amás d'una carta del Conseyeru d'Educación y dípticos ente los centros d'enseñanza. Tamién cuenten sacar anuncios en radio n'asturianu pa la zona central y oriental d'Asturies, y en gallego-asturianu pa la fastera eo-naviega.

La matriculación de los alumnos va poder facese ente'l día 13 y el 26 de xunu nos colexos y del 1 al 11 de xunetu y del 9 al 15 de setiembre nos institutos.

Muñoz insistió na ""tendencia al alza"" tanto de ""alumnos como de profesores"". Señaló que nesti momentu hai 243 profesores de llingua asturiana y que'l so númberu duplicóse dende l'añu 2000. Tamién aseguró que nesti momentu'l 88% de los centros de Primaria y Secundaria ufierten l'asignatura de llingua asturiana, si bien reconoció que deberíen ufiertala toos, aspeutu sobre'l que dixo que tar trabayando.

D'otru llau, y en respuesta a entrugues de los periodistes, Muñoz afirmó que ""col actual marcu llegal nun hai otra forma d'integrar la llingua n'Enseñanza Secundaria qu'ente les asignatures optatives"". Esplicaba asina la diferencia en porcentaxes d'alumnos d'asturianu ente los dos niveles educativos. ""En secundaria l'abanicu d'asignatures ye mayor"", yá que tien que competir con otres materies, como francés, demientres qu'en Primaria namás compite con cultura asturiana.

No tocante a la nueva situación que se xeneraría cola oficialidá de la llingua asturiana, tanto Muñoz como Vega llimitáronse a comentar que tán trabayando ""col actual marcu llegal"" y que si cambia'l mesmu, ""el compromisu va caltenese, esplotándose al máximu les nueves posibilidaes"".

Entrugaos por si taríen a favor de la oficialidá pa cambiar esta situación, el direutor ""afirmó que nesti momentu nun hai nengún problema cola asignatura d'asturianu"", y unvió de nuevo a la tendencia al alza del númberu d'alumnos. Asina mesmo Muñoz anunció que'l tratamientu de la llingua asturiana nel proyeutu de currículu de les enseñances de Bachilleratu ta nesti momentu en procesu d'ellaboración, anque adelantó que va caltener la mesma situación actual d'optatividá, si bien especificó que como tal va tener cuatro hores a la selmana, cuestión que calificó como ""mui positiva""."