El programa "Pieces" estrena nueva imaxen

"""Pieces"" torna esti sábadu a la programación de la televisión pública del Principáu con un anováu formatu nel que rescampla la presencia de la escritora Ana Vanessa Gutiérrez como presentadora.

El programa, producíu por Publicaciones Ámbitu, promete tratar el panorama cultural asturianu al traviés d'una perspeutiva creativa que fai por averar a los espectadores el pulsu de la cultura asturiana, tanto contemporánea como tradicional.

La música, el teatru, la lliteratura, la fotografía, la creación audiovisual y toles manifestaciones de la cultura popular (baille tradicional, gaiteros, tonada…) van tar na base temática d'un programa qu'abandona l'apueste pola rigurosidá formal que carauterizó'l primer añu d'emisiones pa convertise nun magacín cultural más estandarizáu; más televisivu.

Aceptando, pa lo bono y pa lo malo, la so naturaleza audiovisual, busca d'una manera consciente la equiparación con otros proyectos de comunicación cultural televisiva del nuestru entornu (La 2, La Otra, Arte…) La traducción d'esti apueste ye un llinguaxe muncho más dinámicu que-y da al montaxe y la postproducción una importancia mayor de la que tuvo hasta'l momentu."