El Gobiernu recuerda que "inda nun reconoció la independencia de Kosovo"

"El Gobiernu español asegura que la continuidá de los más de 500 militares desplegaos en Kosovo nel marcu de la Fuerza de la OTAN va ""tar venceyada a la evolución de la situación política"" y a ""los compromisos qu'España tien como miembru de les organizaciones internacionales a les que pertenez"".

Esta declaración del Gobiernu tien llugar en respuesta a una entruga parlamentaria sobre'l futuru de les tropes españoles en Kosovo plantegada pol diputáu del Grupu Popular nel Congresu Arsenio Fernández de Mesa y enmarcada nuna serie de cuestiones qu'unvió al Executivu sobre la so decisión de caltener la misión militar española al mesmu tiempu que se niega a reconocer la independencia declarada pol Parlamentu de Pristina'l pasáu mes de febreru.

L'afirmación del Executivu que dirixe José Luis Rodríguez Zapatero ye la primer declaración na que rellaciona direutamente'l caltenimientu del continxente militar en KFOR cola ""situación política"" de la rexón balcánica, amás de los ""compromisos"" coles organizaciones internacionales con participación española, como ye'l casu de la Organización del Tratáu del Atlánticu Norte (OTAN), que llidera la misión militar internacional na zona, la Organización de Naciones Uníes (ONU), responsable de l'alministración del territoriu y la Unión Europea (UE), qu'aspira a sustituyir a Naciones Uníes cola misión Eulex.

Na so respuesta parlamentaria, el Gobiernu recuerda qu'España ""nun reconoció"" la soberanía kosovar y considera que ""la única fonte de llegalidá sobre la situación de la provincia serbia"" y la presencia de misiones civiles o militares internacionales ye la resolución 1244 del Conseyu de Seguridá de Naciones Uníes.

Dichu testu, aprobáu en 1995, señala que'l futuru de Kosovo va tar dientro de la República de Serbia. L'executivu argumenta que la ""misión xenérica de KFOR ye garantizar un entornu seguru qu'impida la vuelta a la violencia ente les partes y facilite'l retornu de refuxaos"".

Tres citar los ""distintos documentos qu'amparen les actuaciones de los militares españoles"" nel marcu de la operación de la OTAN, el Gobiernu asegura que ""la continuidá de la presencia del continxente militar va tar suxeta a la evolución de la situación política de Kosovo y a los compromisos qu'España tien como miembru de les organizaciones internacionales a les que pertenez""."