Los Llendadores de la Ría van recoyer cartes pa L’Anguleru n’Avilés

Esti vienres va celebrase, tres l’ésitu del añu pasáu, la II Folixa de Nadal n’Avilés. Un cuentacuentos y una ufrienda’l nataliegu van preceder a la llegada de los Llendadores de la Ría, que van recoyer les cartes de los neños y neñes presentes pa L’Anguleru.

La Estaya de la Llingua d’Avilés entama esta iniciativa en collaboración con ‘Reciella. Families pol Asturianu’, l’Asociación Cultural Garabuxada, Iniciativa pol Asturianu y el Colexu Públicu Sabugo d'Avilés, que va tener llugar a les 19 hores na Factoría Cultural d’Avilés con entrada de baldre. En primer llugar, va celebrase la sesión última de ‘La Reciella La Factoría’, el cuentacuentos ‘L’Anguleru. Suaños de Navidá’, a cargu d’Olga Cuervo.

Darréu van apaecer Xesús y Lolina, Llendadores de la Ría, que traen dellos regalinos pa los neños y neñes avilesines y que van a recoyer les cartes pa L’Anguleru, que yá ta preparando’l so viaxe a Asturies pa Nuechebona dende’l mar de los Sargazos. Van siguir les actividaes cola llectura del conxuru del nataliegu por parte de los escolinos y escolines del Sabugo y el nomamientu del Maestu Llendador 2016.

Nesta ocasión el gallardonáu ye Pedro Solís, “un llobu mar que dedicó tola so vida a la pesca”, collaborador de la revista del Centru Social de Persones Mayores Xardín de Cantos, asina como en colexos promulgando la cultura pesquera asturiana. “Ye un gran defensor de la pesca sostenible y de les artes tradicionales, muncho más respetuoses col mediu ambiente”, espliquen dende’l Conceyu d’Avilés, que destaca la so critica “pol progresivu desaniciu, nes nueses mariñes, d’especies como'l  besugu o la palombeta, etc., a causa del pocu respetu que se ta teniendo pola mar”.