Industria pide-y a Rede Eléctrica otru trazáu pa la llinia Sama-Velilla al so pasu per Lleón

"El Ministeriu d'Industria va pidi-y a Rede Eléctrica d'España (REE) que presente un itinerariu alternativu al propuestu de primeres pa la llinia d'alta tensión Sama-Velilla, dientro del Plan Enerxéticu Nacional pal 2008-16, al so pasu pel territoriu lleonés, según publica La Nueva España.

Según el diariu, el Ministeriu d'Industria incluyó nel nuevu Plan Enerxéticu Nacional la llinia eléctrica d'alta tensión ente Sama y Velilla del Río Carrión (Palencia), pero con un condicionante d'última hora. El departamentu que dirixe Miguel Sebastián va pidir a Rede Eléctrica d'España presente un itinerariu alternativu al previstu pa la provincia de Lleón.

Asina, fontes ministeriales precisaron que, de primeres, eses variaciones de trazáu afeutarán, namás, al territoriu de Castiella y Llión, polo que l'asturianu, refugáu nel conceyu d'Ayer, nun se vería alteráu. Como apunta'l diariu asturianu, buscar un trazáu alternativu pa la llinia d'alta tensión foi una de les principales promeses del PSOE lleonés nes pasaes elecciones xenerales. El so cabezaleru, José Antonio Alonso, entós ministru de Defensa y güei voceru socialista nel Congresu, aseguró n'abondes intervenciones públiques previes a les elecciones que si José Luis Rodríguez Zapatero llograba la reeleición como presidente, el Gobiernu diba tratar d'alcordar un nuevu itinerariu con Rede Eléctrica y colos vecinos afeutaos, yá que, dende'l so puntu de vista, el previstu nun podía asumise.

Pela so parte la conseyera d'Alministraciones Públiques y vocera del Gobiernu del Principáu d'Asturies, Ana Rosa Migoya, dixo que l'Executivu rexonal nun tien nengún tipu de comunicación oficial per parte del Ministeriu d'Industria de que vaya a cambiar el trazáu de la llinia d'alta tensión Sama (Asturies)-Velilla (Palencia).

Migoya fizo esta afirmación na rueda prensa posterior al Conseyu de Gobiernu. En tou casu, la responsable rexonal, señaló que'l conseyeru d'Industria del Principáu, Graciano Torre, ""va interesase poles informaciones apaecíes en prensa"" porque ""la única constancia oficial que tien el Gobiernu del Principáu ye de l'aprobación per parte del últimu Conseyu de Ministros de la Planificación Enerxética, que confirma los calendarios de les llinies d'alta tensión pendientes y la regasificadora de Xixón"", señaló Migoya.

La dirixente rexonal dixo que'l documentu de Planificación Enerxética aprobáu pol Executivu nacional ""robla"" la condición de ""prioritaries"" de les llinies d'alta tensión pendientes Sama-Velilla y Soto-Penagos, y la conexón con Galicia. Añadió qu'esa Planificación tamién ""confirma"" el calter ""estratéxicu"" de la regasificadora d'El Musel (Xixón), incluyendo la so ampliación nel añu 2013, de manera que nos planes del 2015 va duplicase ""el so tamañu y va tener capacidá p'almacenar gas natural llicuáu que llegue al traviés de buques de gas"". ""Eso ye lo que nos consta oficialmente"", finó la conseyera."