El Gobiernu anuncia una rebaxa del 10% na tarifa de la lluz

"Los 4,5 millones de consumidores que van tener derechu a acoyese a la nueva tarifa social eléctrica nun pagarán nos sos recibos el conceutu de potencia contratada, abonando namás que'l propiu consumu eléctricu. Según anunció'l ministru d'Industria, Miguel Sebastián, esti cambiu va suponer de manera efeutiva una reducción del diez por cientu nel recibu.
L'anunciu llega en viésperes de que les tarifes xuban el preciu pal restu de los consumidores. El ministru anunció amás que la bombona de butanu va baxar un 2,4% a partir del mes de xunetu.

La postura del Ministeriu d'Industria qu'hai díes dexó la puerta abierta a xubes significatives na lluz, en llinia cola propuesta de la Comisión Nacional d'Enerxía (CNE), cambió radicalmente. El ministru d'Industria, Miguel Sebastián, anunció que la nueva tarifa social va suponer un aforru na factura de la lluz pa más de 4,5 millones de clientes. Estes declaraciones prodúcense dempués de que'l presidente del Gobiernu José Luis Rodríguez Zapatero asegurare'l domingu que l'aumentu de la tarifa de la lluz va facese ""d'un mou razonable"", ""averándose más a la xuba del IPC"". Asina mesmo'l ministru d'Economía y Facienda, Pedro Solbes, afirmaba que la tarifa tenía qu'acercase a los ""precios reales"" del costu de la electricidá.

Durante la so declaración na Comisión d'Industria del Congresu, Sebastián esplicó que los usuarios con una potencia contratada per debaxo de los trés quilovatios (KW) van poder acoyese a la nueva tarifa eléctrica social. Según los cálculos d'Industria, n'España hai unos 4,5 millones de cases que van poder beneficiase de les condiciones previstes na nueva tarifa social. Nesti momentu yá hai una tarifa d'esti tipu, la denomada 1.0 qu'afeuta a unos 135.000 consumidores, énte los 20 millones que sumen tolos usuarios domésticos, que tán repartíos ente delles tarifes según la potencia contratada.

L'anunciu de Sebastián llega poco dempués de que'l presidente del Gobiernu, José Luis Rodríguez Zapatero, anunciara que la xuba de la lluz pal restu de cases a partir de xunetu va tar más cerca del IPC que de la xuba del 11% propuesta pola Comisión Nacional de la Enerxía. ""Ye la nuestra obligación velar pola proteición de los usuarios más desprotexíos, polo que diseñamos una tarifa social empobinada a la población que nun pue disfrutar d'un consumu d'electricidá eleváu"", afirmó'l ministru na so declaración.

Per otru llau, esplicó que'l Gobiernu va dexar afitaes mayores penalizaciones al consumu escesivu. ""Vamos apoyar l'usu de tarifes que fomenten l'aforru como les que tienen distintos tramos de cobru horariu, que permitan a los consumidores algamar reproducciones d'hasta'l 10% na so factura eléctrica si xestionen la so demanda, esviando los consumos más intensivos a les hores de menor preciu"", indicó'l ministru."