El CAO aconceya colos representantes d'IX-BA-LV

"Representantes del Conceyu Abiertu pola Oficialidá aconceyaron esta mañana na Xunta Xeneral del Principáu colos voceros del grupu parlamentariu formáu por IX-BA-LV, col envís de poner enriba la mesa los sos puntos de vista no tocante a la redaición del futuru Estatutu d'Autonomía p'Asturies.

El CAO, representáu por Fernando Ornosa y Xuan Gonzalo, espresó la importancia que-y concede'l Conceyu a la ""oficialidá de la llingua asturiana como primer pasu decisivu y necesariu nel camín de la so normalización social"".

Pela so parte los representantes d'IX-BA-LV, Francisco Javier García Valledor, Jesús Iglesias, Noemí Martín y Rafael Palacios; roblaron les palabres del CAO nun clima que la organización definió como ""constructivu y d'afinidá"". Con esti xestu la formación vien a amosar el so compromisu cola inclusión de la oficialidá de la llingua nel testu estatutariu.

Esti conceyu enmárcase nuna ronda de xuntes que'l CAO ta faciendo colos grupos parllamentarios. La selmana pasada foi'l grupu parllamentariu del PP el que s'aconceyó col Conceyu Abiertu pola Oficialidá, amosando asina mesmo esti grupu ""el mesmu análisis y les mesmes inquietúes sobre los derechos llingüísticos de los falantes y la oportunidá histórica na que tamos agora, a les puertes d'otru estatutu que tien que recoyer la realidá asturiana como comunidá que cuenta con una llingua propia, que ye patrimoniu cultural milenariu y que necesita decisiones polítiques series y responsables qu'atayen el so desaniciu"".

Poro, con esti aconceyamientu'l CAO tendría falao con dos tercios de les fuerces polítiques con representación na ponencia estatutaria, faltando namás el grupu que, por embargu, tien mayor representatividá dientro del parlamentu asturianu. Sicasí la intención de la organización en defensa de los drechos llingüísticos ye aconceyase tamién col restu de partíos políticos, instituciones y axentes sociales.

Precisamente en rempuesta al máximu representante del grupu socialista, Vicente Álvarez Areces, el Conceyu Abiertu acaba presentar la campaña ""Doi la cara pola oficialidá"", cola que quier amosar ""el sofitu qu'amuesa la sociedá asturiana pa cola vindicación llingüística""."