Los investigadores de nuevos materiales al serviciu de la humanidá, Príncipe d'Asturies d'Investigación

"La candidatura conxunta compuesta polos investigadores y creadores de nuevos materiales al serviciu de la humanidá foi galardonada col Premiu Príncipe d'Asturies d'Investigación Científica y Téunica.

La candidatura ta integrada por Robert Langes, el físicu Sumio Iijima, el tamién inxenieru Shuji Nakamura y los químicos Tobin Marks y George M. Whitesides. El fallu dióse a conocer esti mediudía nel Hotel Reconquista d'Uviéu.

Los científicos galardonaos descubrieron los 'nanotubos' de carbonu, los diodos emisores de lluz (LEDs), biomateriales que posibiliten la lliberación intelixente de fármacos, la producción de texíos y órganos pa tresplante, asina como la fabricación de materiales de la ""nanoescala"", el desarrollu de nuevos plásticos y materiales aprovechables.

El xuráu presidíu por Enrique Moreno, considera que toes estes téuniques son ""fundamentales pal desarrollu sostenible del planeta y la llucha escontra la probitú"" y los trabayos de los galardonaos ""contribuyen de manera decisiva al aforru enerxéticu y a la utilización de nueves fontes d'enerxía"".

La candidatura foi propuesta por Amador Menéndez, miembru del Xuráu del Premiu Príncipe d'Asturies d'Investigación Científica y Téunica 2008. Cuntando colos apoyos de los Nobel de Química Roald Hoffman, Robert H. Grubbs y Harold Kroto, asina como por Joan Massagué, ún de los científicos que llideren la llucha escontra'l cáncer y Premiu Príncipe d'Asturies d'Investigación Científica y Téunica 2004.

El Premiu Príncipe d'Asturies d'Investigación Científica y Téunica ta destináu a la ""persona, persones, equipu de trabayu o institución que ficiere descubrimientos o llabores d'investigación que representen una contribución relevante pal progresu de la Humanidá nos campos de les Matemátiques, Física, Química, Bioloxía, Melecina, Ciencies de la tierra y del Espaciu, asina como téuniques y teunoloxíes rellacionaes con elles"".

El xuráu tuvo integráu por José Luis Álvarez Margaride; Juan Luis Arsuaga; Juan Ignacio Cirac; Pedro Miguel Echenique; Juliana Fariña González; Antonio Fernández-Rañada; Luis Fernández-Vega Sanz; Santiago Grisolía; María del Carmen Maroto Vela; Petra Mateos; Amador Menéndez Velázquez; Amparo Moraleda; Enrique Moreno; Rafael Nájera Morrondo; María Neira; César Nombela; Fernando Ortíz Maslloréns; Ana Pastor; Miguel Ángel Pesquera; Eduardo Punset; José Ramón Quirós García; Julio R. Villanueva; Guillermo Suárez Fernández; Guillermo Ulacia y José Antonio Martínez-Álvarez (secretariu).

El d'Investigación Científica y Téunica ye'l tercer premiu de la ventésimu octava edición de los galardones qu'entrega la Fundación Príncipe d'Asturies. Hasta'l momentu fueron fallaos el de les Artes, otorgáu a les Orquestes Xuveniles y Infantiles de Venezuela, y el de Cooperación Internacional a les principales organizaciones qu'encabecen la llucha escontra la malaria."