‘El valor del rei’, de Xulio Arbesú, algama’l XXXVII Premiu Xosefa Xovellanos

Esti miércoles fallóse’l quintu y últimu de los Premios Lliterarios 2016 qu’entrega la Conseyería d’Educación y Cultura, el XXXVII Premiu Xosefa Xovellanos de novela. El ganador foi Xulio Arbesú, cola obra ‘El valor del rei’, que suma asina trés gallardones.

El xuráu presidíu pol direutor xeneral de Planificación Llingüística y Normalización, Fernando Padilla, y formáu polos escritores Paco Álvarez –ganador del añu pasáu con ‘Lluvia d’agostu'–, Pilar Arnaldo, José Luis Rendueles y Xosé Nel Riesgo, y  l’asesora téunica de la direición xeneral, Juncal García Velasco, decidióse por mayoría por ‘El valor del rei’ ente les ocho obres presentaes. Nel so acta destaquen “l’ambientación que s'avera a una dómina histórica mala de recrear y que consigue espeyar la vida nel sieglu VIII de forma verosímil; trátase d'una novela coral na que resuelve con gran aciertu la convivencia de trés voces narratives que se dan pasu a lo llargo de la novela”.

Abierta la plica, l'autor de la obra ganadora resultó ser Xulio Arbesú, que presentó esta novela histórica a concursu baxo’l nomatu de ‘Hermes Liébana’. L’escritor de L’Entregu algama asina’l so tercer Xosefa Xovellanos, con una recompensa de 3.000 euros, tres algamar el del 2002 con ‘Potestas’ y el del 2006 con ‘El pisu d’enriba’, nesta ocasión ex aequo con ‘Imago’ de Adolfo Camilo Díaz, que precisamente la selmana pasada llevaba’l IX Premiu María Xosefa Canellada de lliteratura infantil y xuvenil por ‘La mar’.

Arbesú, ún de los narradores de más sonadía d’anguaño, trabaya tamién l’ensayu. Asina, nel so palmarés tán otros dos gallardones de los Premios Lliterarios, nesti casu’l Máximo Fuertes Acevedo, coles obres ‘El destín treshumanu’ (2009) y ‘Los deseos del dineru’ (2012). La composición musical y la realización cinematográfica son otres de la so personalidá creativa.

Los ganadores d’esti añu

Col fallu del Xosefa Xovellanos complétase la llista de ganadores de los Premios Lliterarios d’esti añu. Amás d’Arbesú y de Díaz, los vencedores nel restu d’estayes foron Luis Navazo (VIII Premiu Alfonso Iglesias de cómic con ‘Indianu’), Vanessa Gutiérrez (XXII Premiu Máximo Fuertes Acevedo d’ensayu con ‘El paisaxe nuestru’) y Ángeles Carbajal (XXII Premiu Xuan María Acebal de poesía con ‘Un vasu d’agua’).