Coleutivos del Nalón creen la Coordinadora "Ciclu Combináu Non"

Dellos coleutivos de la comarca del Nalón presentaron esti martes nun actu que tuvo llugar na Casa de Cultura de Sama la Coordinadora ""Ciclu Combináu Non"". El movimientu constituyóse'l pasáu 20 de mayu dempués d'una xunta na que participaron les asociaciones de vecinos La Fontica y Iniciativa pa la Defensa de los Intereses de Lada, la Sociedá de Festexos La Flor, los xubilaos d'El Carmen y el Movimientu Ciudadanu del Valle del Nalón.

L'oxetivu del aconceyamientu yera analizar les consecuencies y l'impautu económicu, social y sanitariu que pue suponer pa la población de Lada en particular y pal restu del valle en xeneral el proyeutu de construcción en Llangréu de dos ciclos combinaos pola empresa Iberdrola, con una potencia total de 1.100 megavatios.

Según el voceru del Movimientu Ciudadanu del Nalón, Manuel Fernández Terán, la coordinadora va tar abierta a ""toles asociaciones que nel futuru quieran sumase al oxetu d'oponese a la materialización d'esi proyeutu"". Terán argumentó que tal proyeutu xeneraría un gran impautu ambiental y de contaminación en Llangréu y que les úniques beneficiaes cola central de ciclu combináu diben ser les empreses enerxétiques, yá que, dende'l so puntu de vista, la planta torga'l desarrollu urbanu y empresarial del conceyu.

""Esi Llangréu que dicen de recuperación medioambiental ye como una especie de pintura plástica, que nel fondu nun existe; ta pensáu pa que realmente nun se fixe población, ta pensáu pa dexa-yos llibertá a les grandes empreses pa facer el so gran negociu, llevando a cabu un atentáu más nel mediu ambiente y na salú de los ciudadanos por mor d'un gran negociu; el negociu de la enerxía eléctrica"", declaró'l mesmu. Amás, dende la Coordinadora ""Ciclu Combináu Non"" consideren que la planta de gas proyeutada por Iberdrola ""nun tien sentíu porque una forma importante d'aforrar enerxía ye producila onde se consume, evitando les perdes d'ente 13 y un 15% que supón el tresporte"".

También manifestaron el so esmolecimien por desconocer les alegaciones al proyeutu que presentó l'Ayuntamientu de Llangréu.

La Coordinadora insistió en que ""la salú nun ta en venta"", y como datos aportó qu'un ciclu combináu como'l proyeutáu por Iberdrola ""produz añalmente 3,5 millones de tonelaes de monóxidu de carbonu y 2.588 tonelaes d'óxidos de nitróxenu, que son les causantes de les lluviés ácides, amás del ruiu y d'otros efeutos perxudiciales, yá que ye como si tuvieren funcionando diariamente peles nueses cais 278.328 vehículos"", informaron dende la Coordinadora.

Asina, el colectivu constituyíu de recién anunció que convocar dir convocando charres, meses informatives y concentraciones col envís d'informar a la ciudanía de les perxuicios que según la Coordinadora tendría la central proyeutada por Iberdrola pa Llangréu."