Bolivia nacionaliza la empresa de tresporte de gas Transredes, filial d'Ashmore-Shell

"El Gobiernu de Bolivia nacionalizó por decretu'l total de les aiciones que la empresa TR Holdings, filial d'Ashmore-Shell, tenía na empresa Tresporte d'Hidrocarburos Sociedá Anónima (Transredes), colo que se pon el puntu al procesu de nacionalizaciones qu'entamó'l 1 de mayu del 2006.

Según anunció oficialmente TR-Holdings, una empresa d'Ashmore Energy International (AEI) y Shell Gas (Latin Americana) foi nacionalizada esti llunes al traviés del decretu supremu númberu 29.586 que promulgó'l presidente Evo Morales na planta que Transredes tien nel departamentu de Santa Cruz.

A partir d'agora la estatal Yacimientos Petrolíferos Fiscales Bolivianos (YPFB) va controlar el 98 por cientu de Transredes, que va tar presidida por Gary Daher. Morales volvió a dicir que les empreses estranxeres son bienveníes a invertir en Bolivia, asegurándo-yos garantíes de seguridá xurídica, ""en tanto que respeten les normes bolivianes"".

El decretu col que YPFB asume'l control de Transredes señala que ""se nacionaliza la totalidá del paquete d'aiciones de TR-Holdings (Ashmore) na sociedá Transredes, debiendo ser tresferíes al Estáu bolivianu baxo la titularidá de (la petrolera estatal) YPFB"". Según informa la oficial Axencia Boliviana de Noticies (ABI), YPFB va pagar a TR-Holdrings 48 dólares por aición en Transredes, deduciendo previamente tolos pasivos como quedó afitao nel decretu 29.541 del 1 de mayu del 2008.

El ministru d'Hidrocarburos, Carlos Villegas, añadió que nun principiu'l Gobiernu pretendía comprar sólo'l 2,66 por cientu de les aiciones de TR-Holdings p'algamar la mayoría na participación. Por embargu, como nun se llegó a un alcuerdu nel mes que duraron les negociaciones con Ashmore, finalmente decidióse por mercar el paquete d'aiciones enteru de ""los socios estranxeros""."