Ban diz que "fai falta voluntá política" pa resolver la crisis alimentaria

"El secretariu xeneral de la ONU, Ban Ki Moon, alvirtió, na Conferencia d'Altu Nivel sobre la Crisis Alimentaria Mundial, de que van facer falta ente 15.000 y 20.000 millones de dólares añales nos próximos años pa encarar l'actual crisis alimentaria si se quier evitar qu'ésta s'agrave énte l'aumentu de la población mundial, que va ser de 7.200 millones pal añu 2015, polo que llamó a los dirixentes mundiales a ""actuar xuntos agora"", pero tamién con midíes a llargu plazu.

Según Ban, la grave crisis alimentaria actual supón una ""amenaza"", yá que pue llevar a otros 100 millones de persones a sumase a los 850 millones que nun tienen un accesu direutu a los alimentos, pero tamién ""una oportunidá"" pa que ""se revisen les polítiques pasaes"" y pa que, al tiempu que s'actua pa responder de forma rápida a los altos precios de los alimentos, s'adopten midíes a llargu plazu pa ""meyorar la seguridá alimentaria mundial"".

El secretariu xeneral sorrayó la necesidá de que la producción alimentaria ""aumente nun 50% pal 2030 pa poder atender la creciente demanda"", lo que supón, al so xuiciu, ""una escelente oportunidá pa recuperar l'agricultura"". Esto pasa, añadió, ""por meyorar l'accesu de los más débiles a los alimentos y, darréu, entamar midíes p'aumentar la disponibilidá d'alimentos nes sos comunidaes"".

""La población mundial va algamar los 7.200 millones de persones pal 2015"", sorrayó Ban, alvirtiendo de que ""los problemes d'anguaño van ser muncho mayores mañana si nun actuamos agora"". Poro, ""encamiéntovos a adoptar midíes urxentes y valientes p'abordar esta crisis mundial d'alimentos dende'l tueru"" asina como un ""firme compromisu de siguir avanzando"".

Nesti sen, Ban reconoció que ""nun va ser fácil, pue facer falta un gran aumentu del apoyu financieru en forma de sovenciones"". D'acordies coles estimaciones del secretariu xeneral, ""el preciu global pa los gobiernos nacionales y los donantes internacionales pue superar los 15.000 o 20.000 millones de dólares añales a lo llargo de dellos años"". Asina les coses, añadió, ""esto va requerir una enorme voluntá política"", por eso, dixo, ""tenemos qu'abandonar esta conferencia con un sentíu d'intención y de misión, sabiendo que tamos aliaos nel nuestru determín de facer la diferencia"". ""Sólo actuando xuntos, n'asociación, podemos superar esta crisis, güei y pa mañana"", sorrayó."