Dando la cara pola Oficialidá

"El Conceyu Abiertu pola Oficialidá (CAO) presentó esti martes la campaña ""doilacara.net"" que trata de recoyer l'apoyu de ""miles de persones"" que van facese una semeya col cartel col mensaxe ""Yo doi la cara pola oficialidá/Eu dou a cara pola oficialidá"", pa la so posterior esposición en pancartes y na páxina web Wdoilacara.net"".

La campaña foi presentada énte la Xunta'l Principáu por dellos representantes del Conceyu Abiertu pola Oficialidá y militantes de la Xunta pola Defensa de la Llingua, organización perteneciente al CAO y collaboradora nesta aición. Delles persones llevaben una pancarta cola conseña de la campaña y con dalgunes de les semeyes de persones que yá dieron el so apoyu a la mesma.

Otres persones informaben a la ciudadanía del entamu d'esta iniciativa y solicitaben que se ficieren la semeya con cartelu. Según esplicó'l CAO nun comunicáu, l'actividá consiste na ""recoyida masiva y esposición de semeyes individuales de persones col mesmu cartel"".

Los interesaos puen atopalu na propia páxina web, onde ta la información sobre la cmapaña, enllaces pa descargar y imprimir la fueya del cartel, tanto n'asturianu como gallego-asturianu, y un corréu electrónicu al que mandar les semeyes: doilacara@gmail.com.

Ente los actos que van entamase nel marcu d'esta aición, tán actividaes como la recoyida de semeyes per tolos campus universitarios d'Asturies, contautos informativos con más de 200 asociaciones y una fiesta de presentación en La Casa Posafueyes (local de la Xunta) el vienres, 6 de xunu.

Ernesto Avelino Suárez, voceru de la Xunta Pola Defensa de la Llingua, aseguró qu'esta organización yá tien ""cientos de semeyes"" de persones apoyando la oficialidá, y que la recoyida va ""ser llarga porque va durar tolo que dure'l procesu de reforma del Estatutu d'Autonomía"", nel que'l CAO demanda la inclusión de la oficialidá de la llingua asturiana. Los organizadores cuenten con algamar ""miles de semeyes"".

El comunicáu pon enriba la mesa'l fechu de que la campaña ""va valir pa dexar claro l'apoyu de la sociedá asturiano hacia la vindicación de la oficialidá. Tamién va valir facer un llamáu a la responsabilidá de los partíos asturianos representaos na Xunta Xeneral que tán nestos momentos aldericando sobre los conteníos de la próxima reforma estatutaria"", añadió'l testu."